Ministru Turizmu, Komersiu no Industria José Lucas do Carmo da Silva hatete, nia simu orientasaun husi Primeiru Ministru Taur Matan Ruak atu oinsa bele buka merkadu ba industria kiik sira iha TL.
"Simu orientasaun klaru husi Primeiru Ministru atu haree industria ki'ik sira iha rai laran, maske industria mediu iha ida rua maibé, atu haree sira-nia merkadu ne'e oinsa, no iha area komersiu nian atu haree mós merkadu, tanba durante ne'e ita sosa hela de'it, entaun komesa hanoin ona haree ba merkadu tanba ita-nia problema iha merkadu, nune'e MTKI atu haree ba produtu sira par bele fa'an iha merkaduu,” dehan nia hafoin hasoru-malu ho PM Taur iha palasiu governu, Kinta (02/07).
Aleinde ne’e, nia dehan, PM Taur mós husu ba MTKI atu tetu didi’ak programa prioridade sira hodi aprezenta molok atu dezenvolve.
"Iha orientasaun seluk mós oinsa atu haree no tetu didi’ak fali programa sira ne'ebé mak MTKI hola parte iha reziaun no mós ligadu ba internasional hodi lori mai aprezenta ba Primeiru Ministru," dehan ministru ne’e.