Vise-Ministra Turizmu Komunitariu Kulturál (MTKK), Inacia da Conceição Teixeira hatete, agora lalika preokupa de'it atu halo viajen ba rai-li'ur, maibé tenke halo planu hodi dezenvolve turizmu iha rai-laran.
"Agora ita labele halo viajem ba rai-li'ur maibé tenta para halo planu oinsa atu dezenvolve turizmu doméstika ninian", dehan nia, hafoin hasoru-malu ho Primeiru Ministru, Taur Matan Ruak, iha Palásiu Governu, Tersa (07/07).
Nia dehan, atu halo dezenvolve turizmu doméstika, dahuluk tenke halo planu ba fatin sira ne'ebe prioridade.
Nia dehan, turizmu atu sai dezenvolvidu presiza investe iha setór privadu, tanba ne'e governu iha ninia papél liuhusi Ministériu Turizmu Komérsiu Indústria (MTCI) iha ona planu atu halo jestaun.
"Atu dezenvolve turizmu ne'e iha empreza privadu, entaun papél governu nian liuhusi turizmu para oinsá joven sira bele jere rasik fatin potensiál sira ne'e", katak Inacia.
Alende ne'e, nia dehan, soru-mutu ho Primeiru Ministru, Taur Matan Ruak, simu mos orientasaun atu hala'o servisu ira área turizmu no liga ba rekuperasaun ekonomia husi impaktu Covid-19. (*)