Ho preokupasaun ne'e, Prezidente CCI-TL Óscar deside hasoru malu ho Prezidente Parlamentu Nasionál.

Objetivu husi hasoru malu ne'e atu bele ko'alia ho reprezentante povu kona-na oinsa atu ajuda buka solusun, prinsipalmente kona-ba lei no dekretu-lei balu ne’ebé sei xoke-malu hela iha rai ne’e.

“Lei no dekretu-lei balu ne’ebé sei xoke-malu hela iha ita-nia rai ne’e, liuliu kona-ba pra-kualifikasaun. Ida-ne’e dekretu-lei iha tiha ona maibé la konsege implementa. Ida-ne’e ami husu oinsá mak Parlamentu fó hanoin ba Governu hodi implementa fila-fali lei ne’e,” dehan Óscar, ba jornalista, iha PN, Kuarta (22/7).

Nia hatete, iha pra-kualifikasaun tokon US$ 7 ba kraik ne’e ba nasionál, ne'e sai preokupasaun boot tanba ne’e CCI-TL hanoin tenke rezolve tiha problema ida-ne’e, se lae la fó benefísiu ba emprezáriu timoroan sira.

Nia hatutan, maski Lei Aprovizionamentu no pra-kualifikasaun estabelese ona, maibé Governu mak la implementa. 

"Agora kapasidade emprezáriu timoroan bele kaer projetu tokon US$15 to’o tokon US$20. La’ós fó opurnidade beibeik ba ema li’ur mak kaer projetu boot sira, entaun oho setór privadu, tenke fó oportunidade ba timoroan,” dehan nia.

Entretantu, Prezidente Parlamentu Nasionál, Aniceto Longuinhos Guterres Lopes hateten, enkontru ho CCI-TL ne’e ko’alia kona-ba dezenvolvimentu ekonómiku iha rai-laran tanba setór privadu ne’e elementu xave ba dinamiza ekonomia país nian.

“Parlamentu hanesan órgaun ne’ebé halo desizaun polítika, órgaun ne’ebé halo funsaun fiskalizasaun no halo lejizlasaun. Tanba ne’e, Parlamentu sei hala’o intervensaun oinsá atu hametin setór privadu,” dehan nia.

Prezidente PN rekoñese iha lei barak entre lei ida ba lei seluk la haan-malu, karik presiza armoniza no presiza mós atu kompleta sira-ne’ebé seidauk iha, karik presiza iha, parlamentu sei halo hodi kompleta kuadru legál nune’e fó fatin ba setór privadu hodi dezempeña sira-nia papél ho di’ak. (*)