SEKoop Sai Testemuña Ba Pose Membru Kooperativa Kéditu Esperansa 

Tomada de pose ba estrutura kooperativa iha Atsabe (8/8) Tomada de pose ba estrutura kooperativa iha Atsabe (8/8) Foto Tempo Timor

TempoTimor (Ermera) - Sekretáriu Estadu Kooperativa (SEKoop), Elizario Ferreira, fó pose ba membru  Kooperativa Kréditu Esperansa 12 hodi haforsa setór kooperativa iha Postu Administrativu Atsabe, Munisípiu Ermera.



Sekretáriu Estadu Kooperativa (SEKoop), Elizario Ferreira hatete, prezensa SEKoop nian iha Atsabe atu sai testemuña ba pose ba kooperativa foun ne'ebé foin harii ho naran Kooperativa Kréditu Esperansa 12.

Nia dehan, ho pose ne'e kooperativa kréditu ne'e rasik bele sai hanesan organizasaun hodi bele servisu hamutuk ho autoridade lokál sira hotu iha postu administrativu Atsabe no bele dezenvolve atividade ekonómiku ho kriativu iha nivel suku no aldeia sira.

“Prioridade kooperativa kréditu nian prímeiru maka hala'o negósiu osan. Segundu, eduka membru sira atu bele produz atividade produtivu hanesan hakiak animal, halo modo, kuda ai-han hodi kontribui ba sosiedade no mós ba nasaun”, dehan nia, ba jornalísta sira iha, salaun Postu Administrasaun Atsabe, Sábadu (08/08).

Nia haktuir, antes ne'e iha ona kooperativa iha tempu okupasaun Indonézia, no iha tinan 2000 halao atividade kooperativa ida, maibé depois mate.

“Ohin loron kooperativa ne'e mosu atu fó fila-fali raíz ba dezenvolvimentu kooperativa iha Postu Atsabe, ne'ebé la haree ba kór, rasa, seksu no polítiku, maibé serví ema hotu-hotu iha postu ne'e”, dehan nia.

Nia husu, ba membru sira iha kooperativa kreditu atu asegura sira-nia estabilidade finanseira no iha sustentabilidade institusionál, nune'e SEKoop sei nafatin promove formasaun ba dirijente sita tuir tarrefa traballu no mós ba jestór sira atu jere didi'ak kooperativa no inklui apoiu ekipamentu ruma ne'ebé presiza.

Iha fatin hanesan, Prezidente Kooperativa Kréditu  Esperansa 12, Carlito Fernandes hatete, kompromete sei servisu hamutuk ho membru no estrutura sira hodi organiza malu nafatin tuir kbiit ne'ebé sira hetan durante loron lima simu formasaun husi SEKoop.

“Ami ami hamutuk ema nain 15 ne'ebé ohin simu pose, ami sei fahe planu sira ne'e ba ema hotu-hotu iha postu ida nee liu-liu atu komunidade sira bele koñese sobre kona-ba lala'ok kooperativa ninian iha futuru”, dehan nia.

Nia informa, dadaun ne'e sira seidauk iha fundu tanba grupu kooperativa kréditu nee foin harii, maibé iha seman ida ne'e ba oin sira komesa ona halo planu atu realiza enkontru dala-uluk hodi haree, karik balu iha ona fundu bele hatama dadaun.

Nia dehan, kritériu ne'ebé atu sai membru, prímeiru nia tenke hatama osan fundu US$ 25, segundu kada fulan tenke hatama US$ 5, terseiru hatama osan ba administrasaun nian, karik nia iha osan barak bele hatama.

Nia garante, ba oin sira sei sosializa grupu ba komunidade hotu iha suku 12, iha Atsabe nia laran, atu sira bele iha koñesimentu klean liu tan kona-ba lala'ok kooperativa nian, nune'e see komunidade sira hakar bele harii tan sanak kooperativa iha Atsabe laran.

Entretantu, estrutura Kooperativa Kréditu Esperansa 12 neebé reprezenta simu ona posse maka kompostu husi (Prezidente) Carlito Fernandes, (vise prezidente) Cipriano Leto Marques, (sekretáriu I) Filipe Casimiro, (sekretáriu II) Tomas de Jesus Magalhães, (tezoureiru I) Frederico Goncalves, (tezoureira II) Verónica de Jesus Fernandes, (fokál poin) Mateus Monteiro.

Prezidente Fiskalizasaun maka Raimundo Gonçalves, (sekretáriu) Francisco Monteiro, (fokál point) Manuel Costa Gomes, husi komite kréditu maka Natalino dos Reis (Prezidente), (sekretáriu) Sabino de Deus, (fokál point) Flaminia de Jesus Fernandes, no iha komite edukasaun nian maka Cipriano Leto Marques (Prezidente), Vitórino Fernandes (Sekretáriu), Zacarias S. Gonçalves (fokál point).  

Rate this item
(0 votes)
Last modified on Monday, 10 August 2020 09:20
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.