Sekretáriu Estadu Kooperativa (SEKopp), Elizário Ferreira hateten, iha loron 21 Jullu 2020, SEKoop halo reuniaun ho negosiante ambulante sira ne'ebé durante hala'o atividade negósiu iha Dili laran.

Negosiante ambulante hamutuk ema na’in 400 mak partisipa ona iha reuniaun ne’ebé SEKoop rasik organiza no husu ba sira hotu adere ba kooperativa hodi hetan formasaun, depois apoiu mós karrosa no sira mós sai hanesan membru kooperativa hodi fasilita sira hala'o atividade negósiu ida di'ak.

"Agora iha 400 pesoa mak rejistadu ona iha kooperativa, hanesan negosiante ambulante iha kooperativa, no sira adere ba kooperativa haat ne'ebé iha Dili laran", hatete Elizário, ba jornalista sira, iha Akait, Tersa (11/08).

Maski nune'e, nia dehan, negosiante sira tenke adere ba kooperativa hodi rai mós osan, nune'e ho osan ne’ebé sira tau iha kooperativa kréditu bele hadi'a fali sira-nia karrosa bainhira nia kondisaun aat, tanba ne'e maka objetivu prinsipál husi SEKoop nia planu.

Nia informa liután, ho osan ne'ebé sira tau iha kooperativa, bele fasilita mós sira bainhira hasoru risku ba problema sosiál ruma, bele asesu nafatin osan ne'ebé kooperativa iha hodi hala'o nafatin sira-nia atividade negósiu. (*)