Diretór Ezekutivu AHDMTL, Gaspar Afonso esplika, sira-nia planu ba oin iha tinan 2021 komesa implementa ona planu estratéjia ba anu fiskál primeiru atu estabelese kooperativa ba ema ho difisiénsia matan, ho objetivu subsídiu ne'ebé difisiénsia matan sira simu labele gasta leet de'it.
"Ita hakarak kria kooperativa ida ba ema ho difisiénsia matan sira atu osan ne'ebé sira simu kada fulan, sira bele investe ba kooperativa, nune'e bele nakdulas ba-mai hodi sustenta fali ema ho difisiénsia matan sira iha futuru", dehan Diretór Ezekutivu AHDMTL, ba jornalista sira, iha salaun Delta III, Elemloi, Kuarta (11/08).
Planu asaun nasionál ne'ebé daudaun hakerek ona iha 2020 to'o 2024, maibé sei hasoru hela krize polítika.
Nia dehan, planu nasionál ne'ebé antes aprova iha tinan 2019, to'o agora implementasaun seidauk másimu, no mós konvensaun direitu ba ema ho difisiénsia, konsellu nasionál seidauk estabelese.
"Edukasaun inkluzivu mós seidauk másimu, tanba ami sira asesu universidade ne'e, ho ami-nia vontade no komitmentu hakarak korre-aan husi probreza, intermus edukasaun, maibé see ami hein fasilidade kompletu, entaun ami sei labele ba eskola", dehan nia.
Nia konsidera, durante ne'e, Estadu nia atensaun ba ema ho difisiénsia matan seidauk másimu, maski iha tinan kotuk PN aprova ona rezolusaun ida, maibé implementasaun to'o agora la realiza. (*)
