Jusi total foos tonelada rihun 30 neebé governu sosa, tonelada rihun 6 mak too uluk ona. Prezidente Sentru Lojistika Nasionál (SLN) Agusto Junior Trindade informa, iha Kinta (13/08) loraik, foos tonelada 6 too ona iha portu Dili.

Nia hatete, foos neebé governu sosa husi rai liur sei tama tuir faze, iha faze dahuluk tonelada rihun 6 no restu sei tama iha faze tuir mai.

"Liga ba pandemia Covid-19 ne'e, governu deside hola tan foos husi rai liur ho montante tonelada rihun 30. Hanesan ita hotu haree katak horseik lokraik to'o ona iha portu Dili hamutuk tonelada rihun 6. Iha 21 Agostu sei to'o tan tonelada 12.500 no dia 30 sei to'o tan tonelada 11.500 par halo kompleta tonelada rihun 30 ne'ebé governu hola husi estranjéiru," dehan Agusto ba www.tempotimor.com iha nia knaar fatin Bebora, Dili, Sesta (14/08).

Tuir nia, foos hirak nee sei rai hotu iha armajen governu atu bainhira presiza halo intervensaun, bele hasai.

"Armajen ba foos tonelada rihun 30 ne'ebé governu hola husi estranjéiru ne'e ami prepara ona armajen haat. Armajen tolu iha Tibar no ida iha Bebora, mais ida iha Bebora ne'e sei iha prosesu reabilitasaun husi JICA," nia dehan.