Prezidente SLN Agusto Junior Trindade hatete, politika governu daualu mak oinsa atu hasa’e produsaun rai laran, tan ne’e SLN hamutuk ho MAP sei halo kampaña boot ida hodi hamoris Timor-oan nia konsensia atu ba halo natar no hadomi produtu lokal.

"Iha fulan ida ka rua mai oin ne'e, SLN sei halo kampaña nasionál ida liu husi publikasaun boot par ema hotu-hotu fila hotu ba natar, hotu-hotu hadomi fali ita-nia produtu lokál par konsumu fali produtu rai laran," dehan Agusto iha nia knar fatin, Bebora, Sesta (14/08).

Durante ne’e, nia hatete, kada tinan governu preve osan boot hodi sosa foos, maibé komunidade sira produz la to'o tarjetu ne’ebé governu iha.

Tuir tarjetu governu nia, nia dehan, presiza tonelada rihun 50, maibé dala-ruma konsege sosa de’it tonelada 1.200 to'o tonelada 1.400.

"Tinan-tinan governu fó prioridade ba ida ne'e, tau osan boot, maibé realidade mak ita-nia agrikultór sira barak mak produz maibé sira la lori hotu mai merkadu, tanba balun sira konsumu iha uma laran, balun rai ba fini no balun de'it mak faan bazeia ba nesesidade,” nia dehan.

Ba tinan ida ne’e, nia dehan, esperansa atu hetan kuantidade foos ne’ebé boot hahú iha ona, tanba agrikultór iha Oebaba, munisipiu Kovalima hahú produs barak ona.

"Ita fiar katak iha tinan ne'e númeru bele sa'e, tanba iha Oebaba, parte Kovalima nian de'it besik tonelada rihun ida ona,” dehan nia.

Durante ne’e, nia informa, governu sosa barak liu foos rai iha area Bobonaro, Kovalima, Ermera, no Vikeke.