Governante ne'e dehan, produtu ne'ebé iha hanesan sorgu tonelada 1.800, hare tonelada 1.600, koto no fehuk ropa.

Tanba ne'e, sei halo koordenasaun ho Ministériu Koordenadór Asuntu Ekonomia (MKAE) ne'ebé lidera programa sesta bázika, atu konsentra produtu sira.

"SEKoop iha ninia membru kooperativa la'ós individu, kooperativa iha ona 214 alistadu iha baze dadus no membru rihun 47 indivizu ne'ebé iha territóriu,” dehan nia.

Prosesu distribuisaun ne'e daudaun iha hela diskusaun oinsá atu ema hotu bele konsumu produtu ne'ebé iha no motiva liután produtór sira atu aumentu produsaun hodi kontribui ba produsaun internu brutu nian.

Distribuisaun sesta bázika ne'e, fahe ba faze rua tan ne'e produtu sira ne'ebé iha sufisiente para kobre ba ema hotu-hotu.

"Haree ba distribuisaun iha faze rua, primeiru Novembru no segundu iha Dezembru, ho ida ne'e produtu iha rai laran sufisiente atu halo kobrimentu ba distribuisaun", nia salienta. (*)