Print this page

PNTL no MP, Entrega ba DJPE Motorizada 151 hodi Leillaun

By September 18, 2020 4111
Motor ba OPS sira nian ne'ebe para hela iha eskuadra PNTL nian Motor ba OPS sira nian ne'ebe para hela iha eskuadra PNTL nian Foto Suplai

Tempotimor (Dili) - Komandu Polisia Nasionál Timor-Leste (PNTL) liuhosi Komandu Munísipiu Dili hamutuk ho Ministériu Públiku (MP) hala'o serimónia entrega motorizada hamutuk 151, ne'ebé durante Polisia Unidade Tranzitu halo operasaun no prende, hodi entrega ba Diresaun Jerál Patrimóniu Estadu (DJPE) Ministériu Finansa hodi prosede tuir tuir prosedimentu halo leilaun.


Komandante PNTL Munisípiu Dili, Superintendente Henriques da Costa hatete, motorizada hirak nee polísia Unidade Tránzitu prende tanba laiha dokumentus motor no karta kondusaun.

Nia hatete, motorizada hamutuk 151 ne'e prende hahú kedas iha tinan 2002, mai to'o agora kompleta ona tinan 16 no okupa tebes kondisaun PNTL Munisípiu Díli kloot ba bebeik, tanba ne'e liuhusi koordenasaun ne'ebé iha, parte PNTL no MP deside entrega ba Diresaun Jerál Patrimóniu estadu atu prosesa tuir lei.

“Hakarak agradese ba esforsu tomak ne'ebé parte MP ho Patrimóniu Estadu ho esforsu tomak ne'ebé maka ohin nee bele realiza serimónia entrega ida ne'e. Tanba ita hatene katak evidénsia ka sasan sira neebé agora dadaun ita haree, balu hahú kedas husi 2002 ninian, mais to'o iha agora halo 16 anos, okupa tebes fatin ida ne'e”, hatete Henriques, iha Kaikoli, Sesta (18/09).

Nia dehan, kondisaun fatin nomós husi prosesu ne'ebé la'ó, ita la'ós la tuir, maibé ida nee impaktu mós ba iha servisu operasionál parte polísia ninian, partikularmente iha komandu munisípiu Díli ninian.

“Mas tanba buat nee liuhosi prosesu, i agora iha ona rezultadu ne'ebé ke diak, ita hein katak ho prosesu entrega ida nee hahú, depois ba futuru sei laó nafatin para atu nune'e iha kontinuasaun”, dehan nia.

Reprezentante Ministériu Públiku (MP), Prokuradór Distritál Díli, Jacinto Babo Saores esplika, situasaun motor hamutuk 151, relatóriu ne'ebé mai husi diresaun tranzitu munisípiu Díli nian, i haruka ba iha PM, tanba motor sira ne'e mai dezde tinan 2008 too 2018 ho razaun laiha dokumentus.

Nia dehan, bainhira laiha dokumentu, ida nee infrasoens ne'ebé maka halo husi ema sira neebe uza, no ida ne'e la'ós parte husi prosesu ida, tanba tuir prosedimentu legais sira hotu katak, bainhira tranzitu prende depois passa auto-prensaun ba sira, sira mai reklama, mais nufin, até tinan barak, nein ema ida mai reklama.

“Entaun, kuandu ha'u mai iha ne'e reuniaun ho komandante distritu, sira aprezenta kestaun ne'e. Entaun, ita buka solusaun oinsá mak atu rezolve, entaun ita haree prosedimentus legais sira hotu, kódigu penál, prosesu penál sira hotu ita haree, katak iha dalan”, informa nia.

Nia hatutan, husu relatóriu husi polísia tranzitu haruka ba MP, depois hodi prosede tuir prosedementu sira hotu, ita haruka ba tribunál hodi husu validasaun ba objetu sira ne'e, aumezmu tempu ita husu atu deklara afavór ba estadu.

“Tanba ne'e maka kuandu deklara ona afavór ba estadu, entaun parte Ministériu Públiku ho polísia tenke entrega ba iha Patrimóniu Estadu hodi jere tuir lei patrimóniu estadu nian, tanba ne'e maka kuandu iha ona termu entrega, situasaun hotu, ita entrega ona ba iha patrimóniu estadu”, dehan nia.

Nia hato'o agradese ba ekipa tomak ne"ebé servisu husi fulan Jullu mai agora, liu-liu ekipa MP ni'an ho tránzitu, tanba hetan suporta ne'ebé durante loron hirak nia laran to'o entrega ba iha Patrimóniu Estadu.

Entretantu, Diretóra Jerál Patrimóniu Estadu (DJPE), Ana Maria Pereira Carvalho afirma, bainhira iha ona desizaun husi MP, na'in ba sasan sira ne'e afavór ona ba estadu maka Ministériu Finansas, liuhosi diresaun Patrimóniu Estadu mak sei haree no identifika hodi prosede tuir prosedimentu jestaun Patrimóniu Estadu nian hodi halo prosesu aliniasaun ba leilaun.

“Tuir jestaun Patrimóniu Estadu nian katak sasan sira ne'ebé tama ona ba iha kategoria ida aliniasaun ka dispozál ninian, entaun ami tenke konsede ho modalidade ne'ebé akontese, liu-liu oinsá ami klasifika uluk ninia kondisaun para ami aplika ona modalidade leilaun nian sira ne'ebé mak eziste”, dehan nia. (*) 

Rate this item
(1 Vote)
Last modified on Friday, 18 September 2020 19:19
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items