Nia hatete, iha grupu ka organizasaun sempre mosu problema, iha membru balun ne'ebé mak laiha responsabilidade, laiha transparansia nune'e hamosu dezentendimentu, maibe situasaun hanesan ne'e hanesan dalan atu ba sussesu.

"Dezafiu ne'e lalika hakfodak, dezafiu ne'e sai hanesan oportunidade atu lao ba oin," dehan Elizário bainhira halo lansamentu ba sede Kooperativa Kreditu grupu Hadomi Jerasaun Futuru iha aldeia Dalun, Suku Tutuluru, Postu admistrativu Same, Munisípiu Manufahi, Sabadu (19/9).

Iha fatin hanesan, reprejentante xefi grupu HJF, Armindo Bento de Jesus hatete grupu koperativa HJF hahú moris iha tinan 2012 ho membru nain 7,  mosu problema hanesan membru balun ne'ebé lasenti organizasaun HJF ninian nune'e too klaran balun deside sai, maibe HJF nafatin eziste ho membru 33 membru mesmu dalaruma sei iha problema.

"Membru sira ne'ebé ativu ne'e balun sira seidauk tau Aan katak nu'udar membru HJF, se hau senti membru HJF entaun fulan-fulan hau tenki rai netik osan tuir regras koperativa nian," dehan Armindo.

Armindo akresenta, Membru sira balun haluha tiha la tau osan too tinan, balun inpresta tiha maibe duransaun tempu liu tiha entaun difikulta membru seluk.

Mesmu nune'e, Armindo hateten ho prejensa Sekretáriu estadu kooperativa Elizário Ferreira nian bele motiva ona membru sira tanba rona dereitamente messagem SeKoop nian.

"Ami strutura inklui membru sira tenki bolu no fo hanoin ba malu, atu nune'e membru sira labele sai tan hanesan tinan hirak ba kotumk," dehan Armindo.

HJF rasik hahu primeiru bainhira hetan formasaun husi Mercy Corps no kria grupu halo kripik, krupuk, tua no seluk, hahu husi grupu refere mak kontinua fali koperativa foun ida iha tinan 2012 ne'ebé kompostu husi feto nain 4 no mane nain 3, hanaran Hadomi Jerasaun Futuru.

HJF inisiu ho osan $70 dollar ne'ebé mai husi kada membru $10, no hetan formasaun husi grupu koperativa husi nasional no Munisípiu seluk. Husi remata formasaun, iha seluk ne'ebé deside involve hodi aumenta membru HJF too 43 pessoal, maibe iha klaran iha membru nain 7 deside sai tanba iha problema ne'ebé individual i atualmente hela membru 33 pessoal.

Entertantu HJ hahu to ohin loron, membru hatama osan kada fulan $40 no too agora hamutuk $18.742, 50 centavos, husi osan refere dadaun ne'e hela iha kofre hamutuk $1, 460 no ne'ebé inpresta ona hamutuk $13, 443 no osan ne'ebé gasta ona hamutuk $1,718.