Ministru Obras Públika Salvador Pires dehan, Lei Orsamentu no Jestaun Finanseira la fó dalan ba governu atu halo pagamentu ba projetu balun husi projetu 143.
Tanba, Salvador dehan, Lei Orsamentu no Jestaun Finanseira hatete katak “governu orsamenta de’it ba komprimisiu ne'ebé ho kompañia sira no governu halo ona, ho nia baze liu husi kontratu”.
Nia hatete, maske projetu ne'ebé kompañia sira implementa tama iha lísta, maibé bainhira sira laiha kontratu, konserteza governu sei la tau orsamentu atu pagamentu ba sira.
“Sé projetu ne'ebé lista iha, mais kontratu la iha, laiha obrigasaun par orsamentu ne'ebé tetu 2020 ne'e, ami la orsamenta. Ne’e laós ha’u Ministru Obras Publikas ninia desizaun, maibé ida ne'e fundus husi KAFI, no nia desizaun ne'ebé la orsamentu ba projetu sira ne'ebé iha lista, maibé laiha kontratu,” dehan Salvadór iha edifisiu Ministériu Finansas, Ai-tarak Laran, Tersa (22/09).
Maske nue'e, nia dehan, MOP sei hein hela solusaun legál jurídiku atu bele fasilita sira atu aprezenta akontabilidade bainhira selu legalmente ba projetu sira ne'e.
Kona-ba karik iha ona informasaun husi Tribunál Rekursu liga ho projetu hirak ne'ebé laiha kontratu, nia dehan, kestaun ida ne'e reprezenta governu mak iha kompeténsia atu koalia, maibé nia rasik seidauk iha informasaun ruma kona-ba projetu sira ne'ebé laiha kontratu.