Hafoin komisaun C simu karta ne'e, komisaun C mós deside kedas hodi halo proposta númeru 8 no 9 hodi altera orsamentu MKAE nian liu-liu iha kategória bens no servisu.
Ba proposta ne'e, Prezidente komisaun C deputada Maria Angélica Rangel katak, nu'udar proponente hodi halo proposta númeru 8 no 9, tanba bazeia ba karta ida husi PM, ne'ebé husu atu halo alterasaun ba iha orsamentu MKAE nian hodi transfere fali ba iha fundu covid nian.
"Ami konsidera mós Primeiru Ministru nia karta mai ami nia komisaun no ami nia relatóriu relata katak, tenki halo transferénsia husi bens no servisu nian ba iha fundu covid nian," dehan deputada Rangel iha nia intervensaun iha plenária Parlamentu Nasionál (PN), Segunda (5/10).
Ba proposta alterasaun ne'e, Ministru Koordenadár Asuntu Ekonomiku (MKAE) Joaquim Amaral agradese ba deputadu proponentes sira ne'ebé halo alterasaun ba proposta anteriór husi orsamentu MKAE nian.
"Proposta alterasaun ne'e, simplesmente atu ajuda guvernu bele ezekuta osan ho lalais, nune'e ministéiru implementadór sira bele asesu iha orsamentu kuandu tau iha kategória fundu covid," dehan Joquim.
Alende ne'e PM Taur Matan Ruak mós afirma, fundu covid ne'e, atu responde ba moras Covid-19, maibé depois evolusaun, situasaun tenki inklui mós establizasaun no rekoperasaun ekonómiku.
"Establizasaun ekonómiku iha médida 19 ho total orsamentu liu tokon $140, ne'ebé mak gasta ona ba transferénsia kas ba família sira," nia dehan.
Xefi guvernu mós esplika katak, médida rekoperasaun ekonomia ne'ebé uza OJE 2020, iha aspeitu haat hanesan, ba familia sira nka sesta bázika, entidade empregadora, emprejáriu individuál sira ikus liu mak seitór informál sira.
Nune'e, rezultadu votasaun ba proposta númeru 9, afavor 64, kontra 0 no abstensaun 1, no votasaun ba proposta númeru 8 passa total afavor 44, kontra 0 no abstensaun 17.
Entretantu orsamentu ba MKAE liu-liu iha bens servisu antes ne'e iha tokon $4.653 maibé hasai tiha tokon $23 husi bens servisu hodi tranfere ba fundu covid, maka orsamentu ba MKAE iha parte bens servisu nian, hela tokon $4.630, Saláriu no bensementu tokon $56, transferensia públiku tokon $109.030.(*)