Tempotimor (Díli)- Atu hametin liu tan relasaun di'ak entre povu nasaun rua Timor-Leste ho Repúblika Indonézia (RI), mak Sekreária Estadu Kooperativa (SEKoop) ho Governu Repúblika Indonézia liuhosi nia embaixada iha TL, planeia ona planu atu bele harii tan merkadu ida iha fronteira hodi komunidade sira bele fa'an sira nia produtu lokál.
Sekretáriu Estadu Kooperativa (SEKoop), Elizário Ferreira hatete, merkadu ne'ebé atu hari'i, sai nuudár merkadu internasionál hodi halo relasaun diak entre povu rai rua nian, maibé iha faze diskusaun entre parte rua nian sei fó prioridade liu ba fa'an produtu na'an.
"Ita loke merkadu iha fronteira, la signifika ita tenke fa'an de'it produtu rai ida nian. Maibé, ami to'o ona iha faze diskusaun ida tama ona iha aprovasaun ba lísta produtus ne'ebé atu faan, prímeiru loloos maka, na'an karau", hatete SEKoop Elizário Ferreira durante nia diskursu hodi komemora loron internasionál Feto Rurál iha munisípiu Likísa, kinta (15/10).
Nia hatete, na'an karau iha merkadu fronteira, folin boot teb-tebes, liu-liu iha RI nian, tanba sira maiória musulmanu, entaun dalabarak liu sira konsumu naan karau, no bainhira iha festa ruma, nia présu boot teb-tebes.
"Entaun, sé mak sei oferese na'an ba iha ne'ebá, normalmente Inan-feton no Aman sira ne'ebé iha kada sira, hakiak karau atu kria kondisaun ida ne'ebé ema bolu dehan 'rumah pemontongan hewan" ne'ebé di'ak, atu bele halo empakotamentu ne'ebé diak atu oferese iha merkadu ne'ebá", dehan nia.
Nia hatutan, produtu segundu ne'ebé atu fa'an mak, foos, tanba nia iha kuantia boot, no terseiru mak tais.
Tuir nia, tais Timor-Leste kualidade liu kompara ho Atambua nian, tanba uza kabas, maibé sira nian uza de'it hena.