“Ha’u hanoin hela, prímeiru tenke kréditu, tanba ita nia komunidade halo kréditu no rai fali osan ba iha suku seluk. Segundu, ita tenke halo loja boot ida iha suku laran hodi fa’an produtu lokál ne’ebé komunidade prodúz”, Xefi Suku Fuat Martins Pinto hateten ba www.tempotimor.com iha administrasaun postu administrativu Iliomar, munisípiu Lautém, kinta (22/10).
Tuir nia, atu hari’i kooperativa ida la’ós fásil, no susar atu implementa, maibé hafoin sira tuir tiha formasaun husi Sekretária Estadu Kooperativa (SEKoop), nia iha ona hanoin ba futuru sei bele servisu hamutuk hodi bele hari’i kooperativa iha suku laran.
Nia mós agradese ba ekipa SEKoop nia prezensa iha sira nia postu administrativu Iliomar, tanba bele fahe ona informasaun kona-ba lala’ok kooperativa ne’ebé importante tebes no nia promete sei fahe informasaun sira ne’e ba komunidade hodi sira mós bele involve iha kooperativa.