Ministru MKAE, Joaquim Amaral hateten, ho orsamentu millaun $2 resin ne’e sufisiente ona ba ministériu ne’e, no importante mak aloka ba área estratéjiku sira liu husi instituisaun autonoma ne'ebé bele halo sinerjia servisu hamutuk no ikus bele fó rezultadu.
"Diak liu ita tau osan oituan hodi koko ita nia kapasidade organizasaun, koko ita nia kapasidade kria grupu, alvu benefisiáriu sira ne'e, sira halo diak liu tan ita estende ne'e fasil ona. Kuandu hetan ona nia modelu ita estende ne'e fasil ona, duke tau osan barak ita ezekuta depois failla mak barak," Joaquim Amaral hateten ba jornalista iha Parlamentu Nasionál Dili, Segunda (9/11).
Joaquim subliña, labele hanoin katak, ho osan bele rezolve problema, iha osan bainhira la preparadu entaun ezekusaun mós ulun moras, tanba ne'e la’o ho orsamentu oituan, dalan barak atu hetan solusaun.
Governante ne'e hateten, hanesan ministériu koordenador MKAE iha orsamentu millaun $2 resin, inklui simu planu rekoperasaun ekonomiku hamutuk rihun $340.
MKAE rasik iha programa apoiu atividade ekonomia ki'ik sira hanesan kontinuasaun husi governu anteriór nia programa, balun sussesu no aloka fali osan oituan atu ajuda re-inisia fali programa, inklui hare'e tan fali inisiativa foun ne'ebé bele suporta ho osan.
"Ami aloka osan oituan, planu rekoperasaun mai tan osan oituan, ami halo transferénsia públika hamutuk rihun $450, naton ba MKAE bele partisipa iha planu rekoperasaun 2021 nian," Joaquim hateten.
Entertantu, ohin MKAE rasik hamutuk ho institusaun autonoma sira halo audiénsia ho deputadu komisaun C, D, E hodi fahe informasaun relasiona ho planu OJE 2021 iha Parlamentu Nasionál.