Asuntu ne'e Elizário hato'o, bainhira sai oradór prinsipál iha semináriu ne'ebé organiza husi estudante Fakuldade Siénsia Sosiál, ho tema "Papél akadémikus ba kooperativa hodi hamosu inovasaun no produtividade iha área ekonómia" iha kampus Universidade Dili (UNDIL) kintál-boot.

"Kooperativa hari'i iha timor, iha 1974, sé mak hari'i kooperativa ne'e, ita nia Prezidente Nicolao Lobato mak hari'i kooperativa ida iha suku Fahilebu, postu Bazartete, munisípiu Likisa. Kooperativa ne'e sira bolu dehan kooperativa konsumu", SEKoop Elizário Ferreira hateten ba estudante sira iha Kampus UNDIL, Sesta (04/12).

Elizário konta tuir katak, hafoin iha fulan dezembru nia rohan iha tinan 1974, Nicolao dos Reis Lobato ho Komisáriu Fretilin nian iha suku sira hanesan Ostiku, Luilubu, Bukoli, postu Vemasse iha munisìpiu Baukau nian promove kooperativa ida ne'ebé fó asisténsia ba funu, liuliu sira iha frente klandestina tau hamutuk hahán, roupa, sabaun mak fó ba sira iha ailaran.

Nia hatutan, uluk sei iha ai-laran, maun-boot sira hamosu liafuan dehan "Falintil mak ikan, povu mak bee", tanba sé laiha be'e, ikan sira mós mate, nune'e hanesan mós povu ho Falintil sempre fó apoiu ba malu.

Dekanu UNDIL husi Fakuldade Ekonómia, Alfredo Pires hateten, liafuan kooperativa la'os ona buat foun ba timoroan sira, maibé sai ona hanesan kultura ida hahú kedas iha tempu luta rezisténsia RDTL nian hodi sobrevive durante funu.

Nia fó ezemplu, bele haree iha uma-lisan, iha suku sira no iha fatin-fatin, buat ida servisu hamutuk la'os buat foun, liafuan kooperativa mak foun, maibé servisu hamutuk la'os buat foun.

"Hotu-hotu servisu hamutuk ne'ebé to'o ikus iha lisaun susesu barak iha luta pasadu. Ne'ebé liafuan ida kooperativa la'os lifuan ida foun iha ita timor. Ita bele hatete katak kooperativa ne'e sai ona hanesan kultura, sai hanesan meius ne'ebé mak ema timor halibur malu hodi servisu", nia dehan. (*)