Situasaun ne’e prejudika tebes kompañia sira atu sosa hodi distribui filafali ba komunidade benefisiariu programa Sesta Bazika iha Postu Administrativu Likisá Villa, munisipiu Likisá.

"Produtu lokál ne'e mak sai hanesan difikuldade boot ida mai ami. Dala-ruma ami rekolla produtu iha territóriu laran, tanba programa Sesta Bázika ne'e nia implementasaun dala-ida de'it. Ne'ebé kompañia sira iha territóriu laran ne'e la'o hotu", Domingos Soares Pereira hateten lia hirak ne’e hafoin sorumutu ho diretór Jerál SEKoop iha Fundasaun Hanai Malu (FHM), Lanud Bairru Pite, Kuarta (06/01).

Nia dehan, munisípiu ne’ebé foos barak liu mak Vikeke, Postu Administrativu Uatulari, tanba iha lansamentu dahuluk bainhira sira ba sosa, iha produtu barak no folin ne’ebé natoon.

Maibé, hafoin produtu lokál hanesan foos rai iha fatin balun hotu, maioria kompañia mak buka no ba sosa iha Uatulari, ikus mai nia folin komesa sa’e, balun foos laiha ona, no balun komunidade dehan rai de'it uza ba halo fini.

"Kuandu ami ba rekolla tama uma sai uma, iha balun ho kuantidade barak, ezemplu hanesan zumbu ne'e barak, sira labele fa'an hotu, sira tenke fa'an de'it zumbu haat ka ida ou rua de'it. Ami husu dehan, tanba saida mak la faan hotu, sira dehan, ami rai prepara ba fini no balun atu han ", nia konta tuir.

Domingos hatutan, produtu seluk hanesan batar, sira sente sei sufisiente, maibé koto, foremungu, fore kelin mak sai problema sira atu bele hetan.

Difikuldade segundu, nia salienta, bainhira iha tempu udan, sira labele tula sasan ba to'o iha komunidade ne'ebé hela dook husi villa, tanba udan tau halo rai namdoras, estrada aat, susar ba sira atu mobiliza produtu ba to'o iha nivel aldeia ho suku sira.

"Entaun, ho karreta rai namdoras, ami presíja loron ida ka rua, udan para, rai maran tiha mak ami foin bele ba halo distribuisaun", nia dehan.(*)