Tuir dadus husi sensu 2015 hatudu katak kafé ne’ebé Timor Leste produs iha kualidade aas iha mundu, maibé produsaun husi agrikultór kafé iha Timor Leste kiik tebes, loron ida produs de’it kilograma haat (4). Ida ne’e lakon dook bainhira kompara ho nasaun Kosta Rika ne’ebé produs kilograma 20 kada loron.

Realidade ne’e sita mós atensaun husi Prezidente Repúblika Francisco Guterres Lu Olo ne’ebé sente preokupa ho kualidade kafé Timor ne’ebé kontrariu ho ninia kuantidade ka produsaun.

"Ohin ha’u hakarak ko’alia liuliu kona-bá kafé, ita-nia produtu ida ne’ebé koñesidu iha mundu ho kualidade aas. Tuir dadus sensus 2015 no estudu seluk, uma-kain liu 38.000 mak prodús kafé no 38.000 mak kuda kafé ba konsumu rasik. Sensus ne’e mós hatudu katak kada uma-kain hetan dollar $600 kada tinan husi faan kafé. Nune’e, ba kada tinan, uma-kain 38.000, hamutuk, hetan  rendimentu total dollar tókon $22 kada tinan husi faan kafé”.

“Dadus hatudu katak kada agrikultór iha Timor Leste prodús de’it kafé kilograma haat (4), loron ida.  Iha Kosta Rika, agrikultór ida prodús kafé kilograma 20, loron ida. Ida ne’e hatudu katak ita-nia produtividade sei kiik tebes kompara ho nasaun-sira seluk", dehan PR Lú Olo iha komemorasaun loron restaurasaun independensia ba dala 17 iha palásiu prezidensial Bairro-pite, Segunda (20/05/2019).

Tuir PR Lu Olo, bainhira haburas indústria kafé iha rai-laran no hasa’e ninia kualidade produsaun no produtividade, bele hetan rendimentu aas liu no beibeik husi merkadu internasional.

PR informa, bazeia ba estudu husi Universidade Monash husi Australia hatudu katak, bainhira investe dollar tókon $154 iha área kafé, sei loke oportunidade serbisu ba ema hamutuk 77.000 no sei fó kontribuisaun real ba produtu internu brutu hamutuk dólar biliaun $7 resin to’o tinan 2050.

"Ho laran-ksolok mak ha’u akompaña katak, parte hotu-hotu ne’ebé envolve iha indústria kafé, hahú husi produtór, kompradór iha rai laran no exportadór, nu’udar individuál ka kompañia, harii ona “Asosiasaun Café Timor-Leste”. Asosiasaun ne’e fó hela formasaun ba ita-nia produtór sira oinsá tau matan ba kafé atu labele lakon kualidade”.

“Ho esforsu, iha Asosiasaun ne’ e, husi parseiru dezenvolvimentu boboot, hanesan Cooperativa Café Timor-Leste, Timor Global, OLAM, ATT, GCC-Timor Leste, PARCIC no Peace Win, ha’u  fiar katak valór kafé Timor Leste nian sei sa'e ba bei-beik", Lu Olo espera.

Iha biban ne’e, Xefe Estadu mós apela ba governu atu oinsá bele insentiva liu tán produtor nasionál kiik sira atu hasa’e liu tán sira-nia produtividade nune’e bele hamenus importasaun aihan husi rai li’ur.

“Ita labele haluha katak importasaun husi rai li’ur hanesan osan sai husi tasi mane ba mout iha tasi feto,” dehan nia.