MKAE Joquim Amaral hateten, iha kompañia ne'ebé distribui ai-haan kuandu kapitál menus ona bele hato'o relatóriu hodi prosesu ba pagamentu.

"Governu iha desizaun ona, sira (kompañia) bele prosesa dokumentu ne'e ba iha ministériu ne'ebé sira halo kontratu, prosesu haruka ba finansa halo prosesamentu hodi halo pagamentu", nia dehan hafoin reuniaun Konsellu Ministru iha Palásiu Governu, kuarta (27/01/21).

Nia esplika, bainhira mekanizmu ba kompañia sira-ne'ebé implementa programa cesta bázika hotu ona, bele hatama dokumentu hodi halo prosesu pagamentu.

Governante ne'e hatutan, kompañia ne'ebé presiza ona osan tenke halo relatóriu hafoin prosesu ba pagamentu, la presiza ezekusaun to'o pursentu hira-hira hafoin halo relatóriu.

"Nia (kompania) presiza ona osan, hatama tagian, importante nia halo uluk servisu, imposível nia la halo servis. Ezemplu nia distribui ona 20 pursentu nia bele reklama bele fó 10 pursentu, buat ida-ne'e normál," nia esplika

Nune'e, kontratór sira mós tenke koopera di'ak ho ministériu implementadór sira atu-bele fasilita prosesu administrasaun.

"Labele hein to'o hotu, balun ne'ebé iha kbiit finanseiru sira la preokupa, balun ne'ebé senti kapitál (osan) natoon bele halo metade hatama reklamasaun, osan sai hodi re-kapitaliza fali, ne'e normál", Nia relata

Kompañia ne'ebé distribui ai-haan ba komunidade sira liuhusi programa cesta bázika hamutuk 170-resin.

"Kompania 170-itál partisipa iha programa sesta bázika ne'e, sira halo hela servisu, ha'u hanoin governu halo hela esforsu atu halo pagamentu iha tempu badak", nia dehan

Orsamentu ne'ebé transforma fali ba ai-haan hodi oferese ba komunidade sira ne'e ba fulan rua nian, kada uma ka'in ida hetan $25 dolar ba fulan ida, nune'e fulan rua hetan $50 dolar no iha fulan rua nian ne'e simu hotu dala ida. (*)