Sekretáriu Estadu Kooperativa (SEKoop), Elizário Ferreira, esplika asina nota entendimentu ho parseiru internasionál ADRA, objetivu atu hahú kooperasaun servisu ba malu, liuliu SEKoop atu ajuda sira iha liuhusi formasaun ba agrikultór sira ne'ebé ADRA rejista ona iha baze.

"Ho ajénsia internasionál ADRA tanba sira-nia servisu ne'ebé kleur ona la'o hamutuk ho kooperativa no agora asina nota entendimentu ne'e, para SEKoop fasilita edukasaun no formasaun ba grupu kooperativa ne'ebé sira (ADRA) aprezenta, sira nakfilak ba kooperativa hamutuk grupu 17,” SEKoop, Elizário Ferreira informa ba jornalísta sira hafoin remata asina nota entendimentu ho nia parseiru sira iha nia kna'ar-fatin, Akait, tersa (02/03).

Nia hatutan, iha faze sira tuir mai SEKoop sei hasa'e liután númeru grupu agrikultór sira iha munisípiu hotu-hotu, tanba bazeia ba lista ajénsia ADRA rejista ona hamutuk grupu produtivu atus-tolu (300) iha Timor-Leste.

“Tuir mai ho Tempotimor inklui mós RTTL ne'e, ho misaun ida de'it atu hato'o informasaun sira relasiona ho atividade sensibilizasaun sira-ne'ebé parte governu halo ba ita-nia sosiedade no komunidade sira atu bele kompriende saida mak kooperativa, hodi hola parte iha vida kooperativa,” dehan nia.

Diretora Adventist Development & Relief Agency (ADRA), Virgínia Pycroft sente haksolok no agradese ba SEKoop tanba bele servisu hamutuk liuhusi asina nota intendimentu ida atubele haree kona-ba grupu agrikultór ne'ebé sira forma hela iha munisípiu Vikeke.

“ADRA servisu tiha ona iha Vikeke, ami ajuda tiha ona grupu agrikultór balu nomós lubuk ida inklui grupu kréditu, empresta no rai osan. Sira la'o tiha ona tinan tolu, agora tempu tiha ona atu sira bele legaliza liután. Entaun, sekretáriu estadu kooperativa sira-nia koordenadór sira maka atu fó treinamentu, formasaun no bele ajuda sira-nia kapasidade ba futuru", hatete nia.

Nia dehan, kooperasaun ida ne'e, parte SEKoop maka sei fó treinamentu ba grupu sira kona-ba jestaun kooperativa nian no sei kontinua apoia sustentabilidade ba futuru.

Nia hatutan, molok ne'e ADRA servisu tiha ona ho grupu agrikultór sira iha baze hamutuk 53 ho atividade produsaun sira mak hanesan produtu ai-lia, nú, kamí, ho maek, inklui mós grupu hamutuk 60 mak hala'o atividade kréditu rai no empresta osan, no prontu ona atu nakfilak sai kooperativa.

Entretantu nia dehan, ADRA nu'udár ONG internasional ida ne'ebé hahú servisu iha Timor-Leste durante tinan sanulu (10) ona, maibé espesífiku ba projetu husi kooperasaun ho SEKoop ne'e, foin hala'o ba tinan tolu.

“Ami nia fokus liu maka ba ajuda agrikultór sira atu bele hasa'e sira-nia produsaun nomós bele asesu ba merkadu ba produtu haat hanesan, nú, kamí, ai-lia no maek, iha tinan tolu nia laran,” nia hakotu.(*)