Munisípiu hitu (7) ne'ebé responsabiliza hosi SEKoop mak hanesan, Covalima, Ainaro, Manufahi, Aileu, Likisá, Manatuto no Lautém.
Sekretáriu Estadu Kooperativa (SEKoop) Elizário Ferreira, haktuir progresu distribuisaun ai-han Cesta Bázika ba povu komunidade husi munisípiu hitu ne'e, SEKoop atinje ona pursentu 83 (83%) no sei hela tán pursentu 17 (17%).
“SEKoop atinje ona pursentu 83 (83%), hela de'it pursentu 17 (17%), entaun ekipa sira tenta atu rezolve, kuandu ha'u-nia hanoin 15 marsu ne'e bele termina ona,” nia informa ba jornalista sira iha Federasaun Hanai Malu (FHM), Lanud, Bairru Pite, kuarta (03/03).
Nia dehan, molok ne'e distribuisaun ai-han cesta bázika iha Munisípiu Covalima, Ainaro, Same, Aileu, Likisá, Manatuto ho Lautém termina ona fulan-dezembru 2020 liubá maibé sei hela suku balun.
“Munisípiu 6 seluk ne'e seidauk termina, tanba balu sei iha suku ida, suku rua. Ezemplu, iha Aileu hela suku rua iha RemexiO, restante ne'e hotu ona. Iha Same hela suku rua, iha Postu Administrativu Alas, sei hela suku ida iha Vila, no suku rua iha Fatuberlihu", dehan nia.
Kona-ba prosesu atu halo pagamentu ba kompañia implemendór sira-ne’ebé servisu hamutuk ho SEKoop, oras ne’e prosesu aprovizionamentu remata ona no submete ona ba Ministeriu Finansa (MF).
“Hotu-hotu prosesu aprivizionamentu atu halo pagamentu ne'e entrega hotu ona ba Ministériu Finansa, hein finansa mak halo pagamentu ba kompañia sira hamutuk 25 ne'e", nia hakotu.(*)