Empreza Bread Talkingliu lokaliza iha Suku Kamea, Postu Administrativu Kristu Rei, Munisípiu Dili, no hala'o ninia atividade hanesan padaria ou halo dosi.
Tuir Idonia Maria Auxiliadora Sanches Paicheco nu'udár Xefe Divizaun Operasaun AIFAESA, katak, halo enseramentu bá sira nia atividade, tanba kondisaun ijiene la di'ak.
"Ohin loron AIFAESA mai halo enseramentu ba indústria ida, ita halo enseramentu, tanba nia kondisaun ijiene la tuir prosedimentu ou regra husi dekretu lei 28/2011, ida ne'e mak ohin halo enseramentu ba empreza Bread Talkingliu iha área bekora nian, tanba kondisaun ijienela di'ak", dehan nia hafoin halo enseramentu ba empreza Bread Talkingliu iha Bekora, sesta (05/03/21).
Suspende atividade ne'e, AIFAESA fó loron 10 bá empreza atu hapara atividade no durante loron 90 nia laran tenke hadi'a kondisaun ijiene.
"Ita fó notifikasaun ba nia 10 dias para bele ezekuta enseramentu ida ne'e, depois iha 90 dias hadi'a nia fatin, iha momentu 10 dias, sé nia la kumpri, prosesu sei submete fali bá Ministériu Públiku", tenik nia.
Bainhira, empreza ne'e la kumpri regra husi AIFAESA nian maka, sei hetan sansaun tuir dekretu lei númeru 23/2009.
"Sansaun ne'ebé sira hetan hanesan AIFAESA nafatin halo ninia prosesu prosedimentu, iha ne'ebá parte jurídiku sei bolu sira bá haree tuir fali, sé kuandu la tuir regra ne'ebé mak iha, sira bele hetan multa tuir dekretu lei númeru 23/2009 kona-bá higiene nian",nia afirma
Tanba, tuir dekretu lei, bele multa rihun $1, to'o rihun $5, maibé depende bá desizaun. (*)
