Iha distribuisaun ai-han Sesta Bázika ne’e Governu liu husi SEKoop kontrata kompañia hamutuk 26 hodi hala'o atividade distribuisaun ai-han ba populasaun sira iha munisípiu hanesan Kovalima, Ainaru, Aileu, Manufahi, Likisá, Manatutu no Lautém.
Hafoin asina kontratu ho SEKoop, kompañia sira hahú servisu hodi distribui hahan ba populasaun sira ne’ebé iha munisípiu balu besik ona konklui no balu sei iha prosesu laran.
Maibé ba Munisípiu Kovalima rasik prosesu distribuisaun konklui ona iha fulan-dezembru tinan 2020.
Prezidente Distribuisaun Seata Bázika iha SEKoop, Tomas Gusmăo dehan, distribuisaun ai-han ba populasaun sira iha polítika rekoperasaun ekonómia ne’e, konklui kleur ona, maibé pagamentu ba kompañia sira seidauk..
"Loloos, parte husi ami SEKoop ne'e konklui hotu ona, maibé agora dadaun ne'e kompaña sira hein hela ninia pagamentu, entaun sei fahe hotu, mais dala-ruma semana pagamentu kuandu la'o, kuandu Covdi-19 ne'e, sé la sa'e, entaun distribuisaun bele normaliza fali atu nune'e fatin balu parte balu husi SEKoop bele konklui”, afirma nia ba jornalísta sira iha Lanud Bairru Pite, sesta (12/03).
Prosesu pagamentu karik bele iha semana ne’e no osan bele tama ona ba konta bankaria kompañia atubele kontinua fali distribuisaun.
"Prosesu pagamentu ba kompaña sira, talvez semana ida tan hanesan ne'e, bele ona halo pagamentu. Agora kauza ida maka Ita-nia kolega sira iha Finansas mak sei afetadu”, haktenik nia.
Sekretária Estadu Kooperativa (SEKoop), Elizário Ferreira hatete, sira prosesa ona dokumentu kompaña sira-nia ba MF hodi hein pagamentu husi finansas ba kompaña distributór sira ne'ebé durante hala’o atividade distribuisaun sesta bázika ba populasaun TL. (*)