Joana dos Reis nu'udár negósiante ambolante iha Largo Lesidere dezde tinan 2006 to'o agora, sente triste tebes, tanba, iha situasaun serka sánitaria, rendimentu tun tebes.
"Ami agora iha Largo ne'e susar tanba, Covid-19 ne'e la kleur Covid-19, prevene hanesan ne'e, ema la mai sosa ami-nia sasán, depois ami lori sáida mak ba oan sira han, ami lori haree ami-nia família ne'e sáida, loron ida hetan de'it 0,75 sentávus lá US$1 ne'e, oinsá”, espresa Joana ba www.tempotimor.com iha Largo Lesidere, tersa (16/03).
Kompara situasaun normál, antes ne'e, ho serka sánitaria, negósiante ambolante Largo Lesidere hetan rendimentu kada loron diferente boot.
"Sidauk Covid-19 ne'e, la'ós dehan, hetan di'ak maibé, US$10, U$5, US$7 loron ida bele iha, Covid-19 tiha loron ida 0,75 Sentacuz, US$1, US$1,50 de'it ne'e, ami hodi saida mak ami han”, dehan nia.
Negósiante ne’e iha oan na'in-neen, no nia kaben hala'o negósiu fa'an nú iha uma.
Nune'e mós, negósiante ambolante, Helena da Costa dehan, situasaun serka sánitaria dadaun ne'e rendimentu tun liu:
"Dalaruma ema hola US$3, dalaruma la hola liu hanesan ne'e de'it, sasán mós folin sa'e, karreta mós la halai, ita la'o de'it, uluk ne'e loron ida paling hetan US$10 ou US$20 bá leten, bele US$30, US$40, maibé agora ema la sosa liu, tanba ema mai polísia sira duni hotu, loron to'o kalan hetan de'it US$5”, konfesa nia.
Negosiante ne’e fa’an sasán durante ne'e iha fatin públiku atu sustenta oan na’in-hitu, mane na’in-Lima no feto na’in-rua. (*)