"Governu perpara orsamentu Rektifikativu lori PN atu halo ajustamentu ba orsamentu 2021 ne'ebé mak aprova ona iha PN iha tinan 2020 fulan-dezembru, ami hanoin katak ho situasaun ne'ebé mak iha, ami hakarak mai fali iha Parlamentu husu atu aprova fali rektifikasaun ne'e, atu nune'e osan ne'ebé 2021 nian ami aloka fali ba iha atividade prinsipal ne'ebé oras ne'e ita hasoru Covid-19”, dehan Jeronimo iha PN Dili, tersa (30/03).
Membru governante ne'e esplika, antes ne'e governu rasik laiha hanoin situasaun covid-19 kontinua nune'e la aloka osan ba Covid-19 tanba hakarak rekopera ekonomia, mesmu nune'e orsamentu rektifikativu rasik sei la foti husi fundu petróleu maibé sei aloka husi Orsamentu Jerál Estadu (OJE) 2021 ne'ebé sei ajusta de’it husi dotasaun governu ne'ebé la nesesáriu aloka ba Covid-19 inklui osan fundu infraestrutura nian.
"Situasaun ida ne'e sei la’o hela de’it, ha’u hanoin sei difikulta ba ita atu ezekuta iha 2021 nian, tanba ne'e mak orsamentu ne'ebé husi fundu infraestrutura no mós orsamentu dotasaun tudu governu, osan ne'e boot oituan, ami halo ajustamentu atu nune'e tau fali ba portaun esensial ne'ebé imidiatamente tenke rezolve fó solisaun ba ita-nia populasaun liuliu inpaktu husi covid-19”, dehan Jerónimo.
Prezidente PN, Aniceto Guterres hatete, mundu tomak afeita maka’as husi covid-19 nune'e nasaun sira refere husu aumenta osan supermental maibé iha Timor-Leste husu de’it rektifikasaun husi osan ne'ebé antes ne'e aprova tiha ona OJE 2021.
"Situasaun covid-19 ne'e halo mundu tomak moris hotu iha situasaun Emerjénsia e covid ne'e rasik la fó serteja ba ema hotu tamba ne'e ita lais liu, di’ak liu ita antisipa hanesan agora dadaun ita akompanã númeru kazu pozitivu ne'e aumenta ba bebeik”, dehan Aniceto.
Entertantu montante orsamentu rektifikativu ne'ebé governu husu ba PN hamutuk millaun US$223 husi fundu infraestrutura no fundu dotasaun ne'ebé mak sei ajusta no aloka espesial ba fundu covid-19. (*)