Tanba, Timoroan na'in-53 aranka husi Dili ba Inglaterra, maibé to'o iha Malázia na'in-35 la konsege kontinua viajen, tanba falla husi ajensia Narpov.

Pasajeiru hirak ne'e, viajen husi Dili, iha loron domingu (18/04), maibé to'o iha Malázia na’in-35 pasaporte Timor-Leste no na'in-18 ho pasaporte Portugál kontinua viajen ba Inglaterra, maibé iha fali teste SWAB husi 18 ne'e ida pozitivu Covid-19, entaun 17 mak kontinua viajen.

Nune'e, iha loron sábadu (24/04), Aviaun Malindo tula hikas Timoroan na'in-35 mai Timor-Leste to'o iha Aeroporto Internasionál Prezidente Nikolao Lobato Komoro, maizoumenus tuku 12:30 otl.

Tuir observasaun www tempotimor.com iha terenu nota katak, loron segunda (26/4), iha parte dader maizoumenus tuku 11:30 otl, Timorona 35 ho família iha ona edifísiu Ajensia Narpov nian hodi ezije responsável ajensia devolve hikas sira-nia osan.

"Ami mai ezije atu devolve fali ami-nia osan", dehan pasajeiru ne'ebé la konsege kontinua viajen husi Malázia ba Inglaterra, Isabel Fatima da Cruz, iha edifísiu Ajensia Narpov, Fatuhada, segunda (26/04).

Nune'e, Diretór ba kompaña Ajensia Narpov Unipesoal LDA, José Alexandre Zeca Guterres hatete, nia prontu devolve pasajeiru sira-nia osan, maibé sei halo verifikasaun balun ba razaun sira ne'ebé halo pasajeiru na'in 35 la konsege kontinua viajen husi Malázia ba Inglaterra.

"Sim, buat hotu ohin ami ko'alia ho sira, Ajensia fa'an tiket, Ajensia presiza justifikasaun katak, tanba sá imi la bele ba", dehan nia.

Ho problema, ne'e Ajensia Narpov promete ba pasajeiru sira ne'ebé kanseladu, semana rua atu rezolve.

"Sira la ba, tanba sáida, ami presiza justifikasaun husi Aeroportu Dili no mós Malázia ne'eba, ami tenke komfirmasaun ho ida ne'e, entaun ida ne'e la'ós prosesu ohin, aban lansung hetan kedan, ami presiza referensia buka mós daduz rezolvidu problema ida hanesan ne'e", afirma nia.

Iha kestaun ne'e, parte pasajeiru ho Ajensia Narpov konkorda malu ona atu fó tempu semana rua ba Ajensia atu rezolve. (*)