Tempotimor (Dili)-Ministru Prezidensia Konsellu Ministru, Fidélis Leite Magalhães hatete, merkadu Taibessi no Manleuana Sei kontinu funsiona durante oras 12 iha loron ida, iha aplikasaun konfinamentu domisiliáriu jerál.
Tanba, reiuniaun Konsellu Ministru iha loron 29 fulan-abril aprova rezolusaun hodi impozisaun konfinamentu domisiliáriu jerál ba iha kapitál Dili.
Ho ida ne’e, populasaun tenke hela iha uma ka iha sira-nia alojamentu temporáriu, tuku 00:00 loron 30 fulan-abril tinan 2021 no tuku 23:59 loron 13 fulan-maiu tinan 2021.
“Merkadu Munisipál Dili nian, Merkadu Manleuana no Merkadu Taibesi, kontinua funsiona hahú husi tuku 6 dadersan to’o tuku 18:00”, dehan Fidélis iha Palásiu Governu, kinta (29/04).
Maibé, operadór no utente ida-idak, molok tama ba Merkadu tenke fase liman no kontinua uza máskara hodi taka inus no ibun, nomós mantein distánsia pelumenus metru ida ho ema seluk.
“Bainhira forsa seguransa sira haree katak labele mantein distánsia sosiál pelumenus metru ida entre utente sira, sei impede utente foun sira atu tama ba resintu merkadu to’o númeru utente sira ne’e sufisiente atu kumpre distánsia ne’ebé temi ona”, esplika nia.
Aliende ne’e, vendedór ambulante ba sasán ka servisu ba primeira nesesidade nian, liuliu produtu ai-han, espesialmente modo tahan, nomós komersiante sira ne’ebé hala’o atividade iha merkadu mantém nafatin regra ba prevensaun nian. (*)
