“Ohin husi SEPS entrega tenda hamutuk 41 ba família afetadu sira, tenda hirak ne'e apoiu husi governu Austrália no ami mai monta no entrega tenda hanesan sentru provizóriu ba família afetadu sira husi inundasaun”, informa xefe ekipa protesaun sivíl ba monitorizasaun sentru de vokasaun Dili, Mariano Ana Lopes, iha sede suku Manleuna, tersa (25/05)
Governu la servisu mesak maibé hetan apoiu liuhosi nia parseira ajénsia umanitária Austrália nune'e tenda ne'e patrimóniu estadu nia no família sira uza provizóriu.
“Tenda ne'e hanesan patrimóniu estadu nia entaun família sira uza provizóriu de'it, kuandu to’o tempu sira reintegra ba família entaun estadu iha dever mai foti filafali tenda ne'e, tanba liuhosi mekanizmu ida sira asina deklarasaun katak sei kuida tenda sira ne'e no entrega filafali bainhira reintegra ba família”, afirma nia.
Iha fatin hanesan, xefe aldeia Lemokari, Estaqui Tilman, sente kontente no orgullu tebes tanba komunidade sira bele hetan lona ne'ebé di'ak hodi asegura-an ba provizária.
"Nu'udar autoridade sente orgullu tanba durante ne'e sira dada de'it lona ida que la merese atu hela ho família, maibé ho apoiu ne'ebé mak iha, mai husi ita-nia governu liuhosi SEPS ho governu Austrália ho nia ajénsia sira bele apoiu tenda ida ne'e, ami sente kmaan oituan tanba bele hela iha mahon ho família no seguru husi anin, loron manas no udan”, dehan nia.
Maski nune’e tenda hirak ne'e sei entrega fali ba estadu bainhira sira reintegra ba família tuir deklarasaun ne'ebé asina kada família. (*)
