Tempotimor (Dili)-Sekretária Estadu Formasaun Profisionál no Emprégu (SEFOPE), liuhusi Diresaun Nasional Emprégu Exterior husu ba traballadór timoroan sira tenke pasiénsia servisu iha sestema nasaun Korea Súl.

Diretór Nasionál Emprégu Exterior (DNEE), Filomino Soares, husu ba traballadór sira mantein servisu tuir ida-idak nia kontratu servisu, bainhira hasoru problema ruma, fásil ba governu nasaun rua bele kontrola.

"Karik ita-boot sai husi sistema, risku ba ita-boot, karik iha Timor mós mate, iha Korea mós mate, no iha Austrália mós mate. Maibé, tenke ser pasiénsia iha sistema nia laran para governu liuhusi ita-nia reprezentante sira n'eebé mak agora dadauk ba haree ita-boot sira, bele kontrola ita-boot sira tuir buat ne'ebé mak iha”, dehan Filomino Soares bainhira akompaña traballadór sira iha Aeroportu Internasional Prezidente Nicolau Lobato, sesta (04/06).

Bainhira traballdór sira hases-an husi sistema kontratu ne'ebé kompaña empregadór sira fó sei lori risku rasik ba traballadór sira no halo moris sai difísil liu iha rai liur.

“Ami sempre fó hatene ba sira para labele hases-an husi sistema, tanba ita-boot hases-an husi sistema, ne'e hakarak tau risku boot ba ita-boot nia-an”, hatete nia.

Ho ida nee, husu ba traballadór sira atu hatudu komportamentu di'ak iha servisu fatin, bainhira kontratu remata mak fila, tanba iha possibilidade ema sei presiza nafatin hodi ba filafali servisu iha Korea Súl.

Entretantu, traballadór sira ne'e hamutuk 66 iha na’in-25 sei ba servisu iha área fábrika, sira na'in-41 iha peska

Ba traballadór na’in-4 seluk ne'ebé kansela tanba pozitivu Covid-19, governu la promete bainhira bele aranka, maibé desizaun husi kompaña empregadór sira.

"Ita lalika halo promesa ba labarik sira dehan katak, o imi sei hetan oportunidade. Ne'e depende ba empregador. Ami ne'e hanesan fonte ida atu liga servisu ne'e, maibé desizaun ne'e empregador sira mak foti desizaun. Maibé, iha empregadór balu mak hakarak atu foti, sira bele tuir fali”, esplika nia. (*)