"Material ba vítima inundasaun sira ne’ebé mak uma laiha liu ona ne'e, to'o agora seidauk”, dehan nia ba www.tempotimor.com iha Hera, domingu (06/06).

Vítima inundasaun ne’ebé lakon uma iha akontesimentu inundasaun loron 4 fulan-abrin tinan 2021, to'o agora balun sei hela iha rezidénsia Padre Canosiana, inklui Parokia ho Eskola Tek-Vok Hera.

Vítima sira ne’ebé antes ne'e refuzia ba padre Canosiana sira iha Hera hamutuk ema atus-rua (200) no balun fila ona ba sira-nia hela fatin tanba uma Lahr tan estragu maka’as, no sira ne’ebé uma estragu totál, hela ho família, no iha ema na'in-26 sei hela sentru evakuasaun.

Iha mos ema na'in-36 mak dadaun mantein iha hela iha Parokia Hera, inklui ema na'in-12 iha eskola Tek-Vok ne'e.

Husi vítima sira ne'e, dadauk iha aldeia tolu mak hetan ona apoiu hahán bazika husi governu inklui Word Vision iha Timor-Leste.

Maske parte autoridade Hera hato'o bebeik ona ba Ministériu Solidaridade Sosial no Inkluzaun (MSSI) maibé seidauk iha solusaun.

"Ami rekomenda ba governu liliu parte protesaun sivíl no MSSI tenke aselera prosesu ne'e, tanba vítima inundasaun sira até agora hein hela sira-nia ajudu, liliu ba ema sira ne’ebé mak uma laiha ona ne'e, tanba agora dadauk sira hela bebeik iha padre sira mós la dun di’ak”, hatete nia.

Enkuantu totál uma-kain ne’ebé afetadu ba inundasaun (kaman no aat) hamutuk 545. Aleinde númeru uma-kain iha Suku Hera, hamutuk 2201 husi abitante 10172 mai husi aldeia Akanunu Mota-Ki'ik, Hali-dolar, Ailok-Laran, Sukaer-Laran no Aldeia Moris-Foun. (*)