"Apoiu emerjénsia totál ba territóriu tomak, agora atinje ona 78 pursentu, hela balu mak seidauk. Husi totál ita nia família ne'ebé mak afetadu ne'e hamutuk hotu, besik 33 mill ne'e, ita konsege distribui, 78 pursentu ida hanesan ne'e”, dehan Sekretáriu Estadu Protesaun Sivil (SEPS), Joaquim Gusmăo dos Reis iha Salaun Ministériu Interior (MI), Vilaverde, tersa (08/06).
Vítima dezastre naturál sira iha Munisípiu 12 no Rejiaun Administrativu Espesial Oekussi Ambeno (RAEOA) konsege distribui hotu.
Dadauk ne'e s esforsu ho orsamentu rektifikativu ni kontijénsia nian hodi sosa apoiu ai-han bázika atubele halo "restocking" fali ba armajen iha Munisípiu sira atu antesipa dezastre naturál.
"Agora dadaun, inundasaun komesa menus ona, e ita komesa ita apoiu hotu ona, maibé iha Munisípiu balu komesa iha ai-sunu, anin-boot, ita tenke ser prepara nafatin ba ida ne'e”, hateten nia.
Aleinde ne'e, Ministériu Finansas (MF) mós aprova ona pedidu orsamentu husi SEPS hamutuk millaun US$3,2 atubele sosa tan ai-hán no nesesidade sira seluk hori preparasaun ba apoiu emerjénsia nian.
Maibé pedidu orsamentu ba apoiu rekuperasaun nian, sira seidauk bele hato'o ba MF, tanba dadus husi Ministériu Administrasaun Estatál (MAE) ne'ebé hatama husi autoridade lokál sira, seidauk tama hotu.
"Rekuperasaun ne'e, mós agora la'o dadauk ona, aban (09/06) parese ami sei ba Ataúro para bele mós apoiu ita-nia komunidade iha Ataúro ne'ebá”, informa nia.
Nune’e mós pedidu orsamentu SEPS husi fundu kontijénsia hodi halo akizisaun material ba apoiu umanitáriu presiza hodi korresponde ba família afetadu hamutuk rihun-20 ne'ebé tuir planu sei kobre ba to'o fulan-marsu tinan 2022. (*)