Print this page

Distribuisaun Sesta Bázika Husi SEKoop Hela Pursentu 5

Ai-han Sesta Bázika. Ai-han Sesta Bázika. Foto Suplay

Tempotimor (Dili)-Programa distribuisaun Sesta Bázika husi Sekretária Estadu Kooperativa (SEKoop) hela pursentu lima (5%) ba populasaun munisípiu 7.

Iha atividade distribuisaun ai-hán sesta bázika ba populasaun sira iha munisípiu 7 mak Covalima, Ainaru, Aileu, Likisá, Manufahi, Manatutu no Lautein.

“Ami hanoin kona-ba programa sesta bázika ne'ebé mak pertense mai iha Sekoop, ita atinje ona 95 pursentu. Tanba iha distritu Lautein, Ainaru, Likisá, Suai (Covalima) remata ona”, hatete Diretór jerál SEKoop, Francisco Xavier ba www.tempotimor.com iha fatin Akait, tersa (08/06).

Enkuantu, munisípiu sira ne’ebé seidauk remata hanesan, Manufahi, suku Betanu, Aileu suku rua iha postu administrativu Remexiu, Manatutu falta suku 4, Laleia Suku tolu, Manatutu Villa Suku Iliheu.

Maibé tuir planu iha loron kuarta (09/06) ekipa husi SEKoop sei hamutuk ho kompaña distributór sira dezloka ona ba munisípiu sira hodi halo mós distribuisaun ai-hán ba populasaun sira ne'ebé durante seidauk asesu.

Durante loron 07 fulan-juñu tinan 2020, bainhira inísia lansamentu distribuisaun ai-hán sesta bázika ba populasaun sira iha suku Tazhilin, Postu administrativu Zumalai, ekipa SEKoop hamutuk ho kompaña fornesidór sempre akompaña prosesu.

Iha prosesu akompañamentu, hanesan aktu hodi koordena servisu ho kompaña oinsá distribuisaun sira bele la'o di'ak, nomós komunidade sira simu informasaun labele mosu konfuzaun husi benefisiáriu sira kona-ba kuantidade ai-hán.

"Ne'ebé durante ne'e di'ak tebtebes, servisu hamutuk ho kompaña, komunidade no autoridade lokál sira di'ak tebes, tanba ida ne'e mak ita besik atu finaliza ona sesta bázika ida ne'e”, hatete nia.

Tanba kompaña distributór sira mós kompromete ona ho SEKoop katak, semana oin sei finaliza ona atividade distribuisaun ba komunidade sira iha munisípiu 7.

“Maibé, informasaun ne'ebé mak husi kompaña mai, dehan katak aban ka bainrua hanesan ne'e, sira kontinua komesa. Entaun, siknifika semana oin bele remata ona”, dehan nia. (*)

 

 

Rate this item
(0 votes)
Last modified on Wednesday, 09 June 2021 12:36
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items