Prezidente Institutu Nasionál Seguransa Sosiál (INSS), Longuihos Armando Leite informa, pagamentu ba idozu sira sei halo tuir desizaun data ne’ebé define hahú 23 fulan-juñu 2021, maibé husu atu benefisiáriu sira tuir nafatin protokolu prevensaun Covid-19
“Totál benefisiáriu ne'ebé mak atu simu subsídiu ida ne'e, hamutuk 94.617 tanba ne'e ha'u hakarak apela ba ita-nia ferik katuas sira nomós maluk idozu sira katak, antes mai simu ita-boot sira-nia direitu ba subsídiu ida ne'e atu nafatin tuir regra husi protokolu organizasaun mundiál saúde ho ministériu saúde”, dehan nia iha Ministériu Solidaridade Sosiál no Inkluzaun (MSSI), Kaikoli, sesta (18/06).
Maibé husu ba idozu sira karik bele se iha tempu atu simu vasina, hafoin bele simu subsídiu hodi prevene-an husi Covid-19.
“Ita-boot sira hatene katak moras ida ne'e perigu tebes ba ita-boot sira ne'ebé ho idade 60 ba leten, tanba ne'e hodi institutu nia naran mós hakarak pelu ba ita-boot sira katak, se iha tempu favór vasina tia lai pois mak nia simu subsídiu”, hatete nia.
Maske subsídiu apoiu ne'e direitu ona, ne'ebé la tuir vasina mós tenke simu, tanba ne'e direitu maibé husu nafatin atubele vasina.
“Direitu atu simu ne'e, ne'e direitu tenke simu maske la vasina, maibé oportunidade ida ne'e hakarak reza mós ba ita-nia maluk idozu sira atubele simu vasina”, haktenik nia. (*)