"Durante semana ida, ita foku liu ba kontestu kooperativa ninian, tanba ida ne’e mak horseik formadór sira fó servisu ba halo identifikasaun iha área negósiu sira ne'e, para depois oras ida mak grupu ida-idak bele aprezenta rezultadu ne'ebé mak sira hetan”, informa Diretór Jerál SEKoop, Francisco Xavier iha Salaun Igreja Katedrál, Vilaverde, sábadu (19/06).

Razaun SEKoop foku ba matéria kooperativa ninian, tanba iha futuru, formandu sira sei ajuda governu hodi hatutan informasaun kooperativa ba populasaun iha rurál.

"Atu ita-nia komunidade sira bele rona informasaun ne'ebé mak kanaliza husi ita-nia formandu sira para komunidade e grupu sira bele hatene kona-ba benefísiu saida mak direta ba sira. Tanba ne'e, ha'u hanoin formasaun durante loron 6 ne'e, la'o kapas tebes, e ita-nia formadór sira akompaña nafatin ho komisaun, e exelénsia sekretáriu estadu mós akompaña nafatin”, dehan nia.

Aleinde ne'e, Sekretáriu Estadu Kooperativa (SEKoop), Elizário Ferreira, mós orienta ona ekipa tékniku no formadór sira, atu konvida mós ministériu relevante sira hodi bele partilla mós esperiénsia ligadu ho kooperativa hodi bele servisu hamutuk.

"Ita sei konvida mós ministériu relevante sira ne'ebé mak sei mai aprezenta kona-ba sira-nia planu, sira-nia polítika, oinsá nak ita bele servisu integradu iha baze, atu nune'e bele hasa'e ita-nia ekonómia, liuhusi ita-nia ekonómia komunidade ninian”, hateten nia.

Entretantu, formandu sira hamutuk na’in-atusrua ne'e (200) mai husi juventude sira iha postu administrativu hotu nia reprezenta inklui membru kooperativa sira iha territóriu tomak. (*)