Movimentu kooperativa CCM hari’i iha Suku Mota-ulun, Postu Administrativu Bazartete, Munisipiu Likisá, ho misaun mak atu foka ba atividade agrikultura, peska no pekuária.

Maibé, tanba membru sira ne'ebé hola parte iha kooperativa ne'e, maioria hala'o kna'ar hanesan funsionáriu, no laiha tempu atu organiza atividade hirak ne'e, nune'e sira deside la'o ho kooperativa kréditu.

“Entaun tenke ser halai ba kréditu, rai osan nomós foti osan, e ami agora iha ona kapital hamutuk US$30 mill, no ami iha membru hamutuk 103”, hatete Prezidente Kooperativa CMM, Valentim da Silva Sarmento, ba www.tempotimor.com liuhusi telefone, kuarta (30/06).

Maske fofoun kooperativa hari'i, ema barak mak sei dúvida kona-ba benefísiu saida mak sei hetan bainhira sira envolve-an iha kooperativa.

“Ami sempre enkoraza sira katak, bainhira ita sai membru iha kooperativa, nia di'ak ida mak, ita-boot tau ita-nia osan, depois ita rasik mak sai na'in ba osan ne'e. Entaun, ho ida ne'e mak iha família barak mós rona e hakarak atu mai tan”, dehan nia.

Kooperativa ne’e iha planu hakarak atu hari'i merkadu tradisionál iha munisípiu Likisá, tanba produtivu barak mak oras ne'e bandona, no sira iha esperansa sei dada ema barak liután atubele sai membru ba kooperativa CMM iha futuru, tanba sira rasik iha ona dezeñu ne'ebé kompleta ba erkadu tradisionál. (*)