Tuir informasaun ne'ebe www.tempotimor.com asesu liuhusi pájina facebook Gabinete Ministru Finansa (MF), Rui Gomes katak, pagamentu hirak ne’e halo hafoin Ministériu Finansa simu pedidu pagamentu husi MTKI hamutuk 67.

Ho ida ne'e, Ministeriu Finansa iha loron tersa (06/07), realiza pagamentu ba kompaña 53 no pedidu pagamentu ba kompaña 14 tenke devolve ba MTKI atu kompleta rekezitu pagamentu tuir Lei haruka hodi submete filafali ba MF.

Enkuantu iha fulan-Marsu 2021 to’o iha inisiu fulan-Jullu 2021, MF realiza ona pagamentu Sesta Bázika (faze I no faze II) hamutuk millaun US$41,2, ba Kompaña fornesedór sira (100%) kumpre sira-nia devér hodi selu impostu rendimentu 0,5% husi sira-nia totál pagamentu ba Autoridade Tributária MF ho totál kontribuisaun impostu hamutuk rihun US$206,4.

Maibé inisiativa kompaña lokál kumpre sira-nia devér ne’e, fó mós implikasaun ba taxa ezekusaun governu liliu iha parte ezekusaun reseita doméstika ne’ebé to’o iha 30 juñu 2021, atinje ona millaun US$77,3 ka 41% husi totál estimativa reseita millaun US$187,1.

Pozisaun Ministériu Finansa, mós aprova ona CPV no PR foun Sesta Bázika hamutuk 108 iha faze dahuluk Ministériu Turismu no Komersiu Industria (MTKI) iha CPV 67 ho montante millaun  US$21,3, no iha faze datuak Sekretáriu Estadu Kooperatuva (SEKoop) CPV 17 ho montante millaun $US7,9 no faze datoluk Ministériu Agrikultor no Peska (MAP) CPV 24 ho montante millaun US$2,9.

Nune'e CPV no PR nia aprovadu hirak ne’e haruka filafali ona ba Ministériu Implementadór sira hodi hahú prosesu aprovizionamentu interna iha ministériu implementadór idaidak no sei submete filafali ba MF hodi halo verifikasaun molok realiza pagamentu.

Aliende, Ministeriu Finansa mós  liuhosi Sekretariadu Tékniku Fundu COVID-19, kontinua serbisu hamutuk ho Ministériu Implementadór sira atu konklui pagamentu Sesta Bázika ba kompaña lokál sira ne’ebé mak fornese ona ai-hán ba komunidade sira.

Bazeia ba relatóriu husi Ministériu Koordenadór Asuntu Ekonómiku, to’o iha loron 14 juñu 2021, benefisíariu sira ne’ebé mak simu ona Sesta Bázika hamutuk ema millaun ida rihun-atustolu-resin, ka 91,8% husi totál benefisíariu hamutuk ema millaun ida-rihun-atuslima.

Tanba ne'e, MF hakarak esklarese katak molok Sekretariadu Tékniku Fundu COVID-19 realiza pagamentu, kompaña sira hotu tenke kumpre sira-nia devér hodi ba selu sira-nia impostu rendimentu (income tax) 0,5% husi sira-nia totál rendimentu konforme Lei Tributária haruka. tanba Kompaña sira tenke aprezenta sira-nia resibu pagamentu impostu rendimentu ba Sekretariadu Tékniku Fundu COVID-19 atubele realiza pagamentu finál. (*)