"Kooperativa ida ne'e ami hari'i iha 2019, ami hetan membru 200, ami-nia osan montante US$158,354. Ami hari’i ho montante osan ki’ik ne'ebé iha nia funsaun hanesan uza ba atividade kooperativa, depois ami la’o”, dehan Prezidente Kooperativa HUKIFU), Abríl Binamu Simões, iha Suku Seloi Malere, sábadu (14/08).

Kooperativa hari’i husi membru na'in-6 ho valór osan báziku hamutuk dollár Amerikanu atus-lima (US$500).

Kritéria atu sai membru ba kooperativa, ema ida tenke hatama uluk osan Uas$25, hodi fahe ba parte lima, no kada fulan, ema ida obrigatóriu hatama US$10.

"Depois ida ne'e nia rai, to'o iha kritéria fulan 4, nia bele empresta. Agora, nia empresta ita bele haree filafali ba nia rekening ne'ebé durante nia rai ne'e hira, maizumenus to'o ona 50 pursentu (50%), ita bele fó 100 pursentu (100%), ne’e para aban bainrua selu falla karik, hela 50 pursentu (50%), ita bele ko’a nia osan ne'e taka fali ba. Sé laiha fallansu, nia selu hotu, nia bele foti filafali 50 pursentu (50%) ne'ebé iha”, esplika nia.

Fofoun hari’i kooperativa ne'e hahú uluk ho atividade produsaun hanesan kuda modo, maibé tanba hetan rendimentu kada hahú iha ona mudansa, membru sira kria tan atividade kréditu hodu rai no empresta osan.

"Iha ne'e ami kuda modo, depois lori ba hatama iha supermerkadu no loja sira iha Dili ne'ebá. Entaun ami rai osan hamutuk ne'e mak hetan osan ne'e barak loos ona", dehan nia.

Ho rendimentu kada loron husi kooperativa HUKIFU, oras sira ne'e osan balu sira uza ona hodi hari’i sede rasik, maibé foin atinje pursentu 35 (35%).

"Ida ne'e mak agora dadaun ami la'o hela ida ne'e, ami sei iha konstrusaun ona, ami atubele aruma ami-nia osan ne'e bele tau hamutuk iha fatin ne'ebé di'ak, hodi bele ajuda hadi’a komunidade sira-nia moris”, hatete nia.

Ho ezisténsia husi kooperativa ne'e, halo membru barak oras moris hahú iha mudansa no balu susesu ona liuhusi apoiu oan ba eskola iha universidade no balu sosa ona karreta rasik, inklui balu kria ona negósiu ba aan rasik.

"Kooperativa ne'e ami hari’i, komunidade sira mós sente kontente tanba sei fó benefisiu di'ak ba ami. Entaun ami sente kontente ho kooperativa ida ne'e", afirma nia.

Delegadu Aldeia Maurusa, Leonardo de Araujo hatete, durante observasaun hatudu membru sira iha kooperativa sempre la’o ho di’ak, maske komunidade barak mak la envolve direta iha kooperativa, maibé maioria mak hatene kona-ba lala'ok no serbisu sira kooperativa nian.

"Komunidade sira iha ne'e la maiória iha kooperativa, maibé sira koñese di’ak kona-ba oinsá lala'ok husi kooperativa Hukifu. Observasaun husi autoridade mak HUKIFU hasoru duni problema, maibé sira eziste nafatin hodi hala'o atividade kooperativa la'o ba oin. Pursentu 30-resin ona hodi hari’i sede. Maibé, ami hanesan autoridade sempre fanun sira atu hala'o nafatin atividade”, afirma nia.

Entretantu, Kooperativa HUKIFU lokaliza iha Aldeia Maurusa, Suku Seloi Malere, Postu Administrativu Aileu Vila, Munisípiu Aileu. (*)