Tuir portal governu nian katak, governu Timor-Leste iha fulan-janeiru 2015, iha Ministériu Negósius Estranjeirus no Koperasaun, asina ona akordu formál ida kona-ba Akordu especial investimentu ho Heineken Asia Pacific. Heineken hakarak atu, iha tinan ida ne’eba nia laran, hahú harii fábrika ida iha besik Dili, ne’ebé sei fabrika bebida oin-oin, inklui serveja, refrijerante no bee. Projetu ne’e prevee ona atu bele funsiona iha tinan rua nia laran hafoin de asina kontratu refere, hodi harii postu servisu diretu nian hamutuk 200 no postu servisu indiretu nian hamutuk 800. 

Maibe foin lala’is ne’e, Diretor kompañia internasional HEINEKEN Timor Leste, Vinay Mathur hatete, durante ne’e HEINEKEN importa Heineken no iha Fabrika Heineken iha Beraka ne’e produz de’it BINTANG, Tiger no ABC inklui Amigo no Liu Rai, no sira seluk importa de’it hosi rai liur. 

“Saida mak ami produz iha Hera ne’e mak BINTANG, Tiger, ABC, Liu Rai no Amigo. HEINEKEN, Pepsi no Sagres ami importa hosi liur,” nia hatete ba Tempo Timor iha Timor Plaza foin lalais. 

“Agora dadauk ami halo serveza no be refrijerante sira hanesan Amigo (Pineapple no Orange), Liu Rai. Sagres ne’e mós ami nia produtu ida, maibé ami importa Sagres,” nia hatete. 

Nia deskreve impasse politika ne’ebé akontese iha Timor – Leste kuaje tinan rua nia laran lori anin a’at (negativu) ba produsaun kompañia nian, no sirkulasaun serveza illegal sira mós afeta tebes kompañia. 

Nia konta hikas, saida mak akontese durante tinan rua ikus mak serveze sira mai hosi liu kontein alkoliku 12% to’o 20%, no moris ka sirkula kuaje dala ha’at, no serveza sira ne’e perigu tebes ba sosiedade. 

“Ami preokupa tebes ba situasaun ne’e, tanba . . . ami bele halo serveza ho nia alcohol hosi 10% to’o 20%, ami bele halo, fasil hela, maibé ami sei nunka halo serveza sira ne’e, tanba ami hatene katak ida ne’e sei oho sosiedade,” nia esplika.

“Ba agora, ami nia negósiu sofre hela, tanba sirkulasaun serveza sira ne’e iha Dili”. Ami hakarak governu bandu serveza sira ne’e hotu ne’ebé kontein alcohol barak liu,” nia sujere. 

Nia esplika, situasaun ne’e hahu mosu iha tinan 2016 to’o 2017.

“Durante periodu tinan rua kotuk, ekonómia la di’ak. Mosu redusaun itoan iha ekonómia lokal no ida ne’e afeta ba ami nia produsaun,” nia esplika.