Iha intervesaun SEKoop, Elizário Ferreira, husu ba membru no estrurura kooperativa atu fiar malu hodi jere kooperativa ne'e ho di'ak, nune'e komunidade Tutuala bele sente na'in no sai benefisiáriu ba kooperativa ne'e rasik.

"Kooperativa ne'e tenke fiar malu. Sé la fiar malu mak lalika iha kooperativa", dehan SEKoop, Elizário Ferreira, liuhusi karta komunikadu ne'ebé www.tempotimor.com asesu, kuarta (25/08).

Maske kooperativa ne'e hahú ho membru ne'ebé ki'ik, maibé la'ós problema, importante mak tenke fiar malu nune'e lori kooperativa ne'e ba oin ho di'ak liután.

"Ha'u hein ita-boot sira organiza-an, ne'e mak importante no husu hothotu atu envolve-an iha kooperativa, tanba kooperativa ne'e baze mak membru la'ós osan", dehan nia.

Ho ezistensia ne'e sei hetan apoia husi Governu hodi fasilita kooperativa Adorado liuhusi formasaun no kapasitasaun atu estrututa no membru sira iha nafatin koñesimentu hodi bele jere kooperativa.

"Formasaun no edukasaun ne'e SEKoop kontinua fó prioridade, SEKoop sei apoia komputadór no fó apoiu fundu hodi hari'i edifísiu bainhira kooperativa Adorado atinje ona membru 250", esplika Elizário.

Prezidente Kooperativa Adorada, Ervacio da Costa Guimaraes, husu komunidade Tututala hamutuk hodi dezemvolve Kooperativa Adorada.

"Ha'u husu ba inan aman sira no joven sira mai hamutuk hodi dezemvolve kooperativa Adorada", dehan nia.

Maibé husu ba membru no estrurura koperativa Adorada, atu dezenvolve kooperativa foun tuir naran kooperativa nian nune'e komunidade Tututala hotu bele sente kooperativa.

Reprezentante Administradór Postu Administrativu Tutuala, Albino de Araujo, sente kontente ho SEKoop Elizário nia presenza iha suku Tutuala, hodi bele enkoraza kooperativa foun Adorada hodi bele dezenvolve di'ak liután.

"Ha'u husu sé bele Sekretáriu Estadu Kooperativa kontinua fó formasaun no kapasitasaun ba membru no estrurura Kooperativa Adorada nune'e bele jere kooperativa ida ne'e ho di'ak liután", dehan Albino.

Nune'e mós Xefe Tutuala, Tito Caetano hatete, nia parte sente kontente tanba komunidade Tutuala iha inisiativa rasik, hahú kria kooperativa kréditu Uniaun.

"Ha'u sente kontente no agradese, tanba komunidade Tutuala hamutuk hari'i kooperativa kréditu, no ha'u kontente tanba ohin Sekretáriu Estadu Kooperativa rasik maka mai hodi fó pose ba Kooperativa Adorada", dehan nia.

"Ha'u iha esperiénsia, tanba kooperativa iha suku ne'e barak, maibé Governu foin akomula fali ida ne'e ha'u apresia tebes. Tanba ne'e ha'u husu ba membru kooperativa, ha'u lakohi hari'i ohin aban bainrua kooperativa lakon filafali", hatete nia. (*)