"Tanba ita agora, ita hetan ona konfinamentu obrigatóriu, semana ida tiha ona ne'e ka la'e, agora estende tan semana ida to'o dia 9. Ita sei observa lai, tanba foin mak semana ida, ita harre lai se ema estende tan, ita laiha tan ona be ita tenke atende ne'e ga", dehan Diretór Jerál Ministériu Sidaridade Sosiál no Inkluzaun, Rui Manuel Esposto, iha salaun Ministériu Finansa (MF) Aitarak-Laran, sábadu (04/09).

Tanba, estensaun regra Konfinamentu Jerál ne'e foin mak estende semana ida ba semana rua, entaun presiza haree no observa lai situasaun sira hotu hafoin bele foti desizaun.

Maibé, provizóriu MSSI tenke servisu hamutuk ho Sentru Intergradu Jestaun ba Krize nafatin, liga ho área lojístiku, hafoin halo deskusaun porfunda hodi bele haree oinsá atende situasaun iha rai laran.

"Ita lakoi foti risku, Governu deside katak konfinamentu obrigatóriu depois ita ba halibur fali ema, entaun presiza iha diskusaun ida depois mak ita bele responde buat ne'e", dehan nia.

Enkuantu apoiu ba ema ho vulnerável sira ne'e, Ministériu Koordenadór Asuntu Ekonomiku (MKAE) liuhosi Sentru Lojistiku Nasionál (CLN) fasilita ona fós hamutuk tonelada rihun-2 ba Ministériu Solidaridade Sosiál no Inkluzaun.

Tanba agora ekipa MSSI mós organiza hela, maibé presiza hetan karta autorizasaun husi SIJK, tanba Dili aplika hela regra Konfinamentu Jerál.

"Ami sei mobiliza hela, parese segunda-feira ne'e tula ona fós husi armajen Tibar mai iha armajen Bebora, depois mak ami foin organiza atu halo distribuisaun ne'e halo nusa", esplika nia. (*)