Tuir informasaun ne’ebé www.tempotimor.com asesu iha sesta (10/09) katak, pagamentu hirak ne’e realiza hafoin Sekretariadu Tékniku Fundu Covid-19, Ministériu Finansas simu pedidu pagamentu husi Ministériu Turizmu, Komérsiu no Indústria hamutuk millaun US$29,5 ba kompaña lokál 72, Sekretáriu Estadu Kooperativa ho valór millaun US$20,2 ba kompaña 24, Sentru Lojístika Nasionál ho valór millaun US$8,4 ba kompaña 61 no Ministériu Agrikultura no Peska millaun US$5,2 ba kompaña lokál hamutuk 31.

Kompaña fornesedór hirak ne’e mós kumpre ona sira nia devér hodi selu impostu rendimentu 0,5% husi sira-nia totál pagamentu ba Autoridade Tributária, Ministériu Finansa ho totál kontribuisaun impostu hamutuk IS$317,5 mil. Inisiativa kompaña lokál kumpre sira-nia devér ne’e, fó mós kontribuisaun ba taxa ezekusaun Governu iha parte ezekusaun reseita doméstika ne’ebé to’o iha 31 agostu 2021, atinji ona millaun US$96,6 ka 52% husi totál estimativa reseita millaun US$187,1.

Bazeia ba relatóriu husi Ministériu Koordenadór Asuntu Ekonómiku, to’o iha fulan-agostu 2021, benefisíariu sira ne’ebé mak simu ona Sesta Bázika hamutuk ema millaun-ida-rihun-atushaat-resin, ka 98% husi totál benefisíariu hamutuk ema millaun-ida-rihun-atuslima.

Ba futuru, distribuisaun Sesta Bázika ba reklamante rihun-25-resin iha territóriu nasionál sei la’o tuir kalendáriu ne’ebé mak trasa ona husi Ministériu Koordenadór Asuntu Ekonómiku hamutuk ho Ministériu Implementadór sira.

Antes ne'e sei iha sidadaun hamutuk rihun-25 ne'ebé mak seidauk simu destaka bázika nune'e Ministériu relevante sira promete sei fahe ba sidadaun reklamante iha tempu badak. (*)