Maske Ministériu Agrikultura no Peska (MAP) liuhusi Gestăo das Florestas Bacias Hidrográficas e Área Mangais (GFBHAM) halo ona rekrutamentu ba Guarda Floresta hamutuk na'in-80 hodi tau matan ba floresta no animál fuik sira iha territóriu Timor-Leste.
Maibe, sei limitadu atu halo bele kontrolu ba flotestal tomak, tanba tuir planu, guarda ida tenke kontrola to'o rai ho ektare atus-haat (400) ba leten.

"Ami-nia númeru guarda florestál ne'e, oituan hela. Ida ne'e la'ós ha'u-nia kompeténsia, mais tanba ha'u hanoin, ha'u mós iha diresaun ida ne'e nian, ke servisu mós iha liña ida ne'e. Ami iha Guarda Floresta ne'e, agora dadauk iha 80 itál pesoál de'it, sé la sala 82 ou 84 pesoál de'it. Ne'e la to'o, ita-nia hanoin dehan, ideal ne'e 400 to'o 500 ektare ne'e tenke guarda ida. Maibé, infelizmente, ita-nia ne'e, ita imajina de'it, ita iha purvolta 600 ital mill ektare, mais ita iha de'it 80 pesoál, entaun ita seidauk ideal", informa Diretór Nasional Gestăo das Florestas Bacias Hidrográficas e Área Mangais (GFBHAM), Adalfredo do Rosário Ferreira, ba www.tempotimor.com, sesta (10/09).

Preukupasaun ida ne'e parte ministériu tenta nafatin, husi kedas governasaun anterior sira, maibé númeru funsionáriu (guarda florestal) sira sei nafatin de'it, tanba la halo rekrutamentu.

"Infelizmente ita seidauk hetan númeru ba ita-nia guarda sira ne'e hasa'e, e sira la'ós iha guarda ne'e de'it mak problema, mais estatutu ba guarda mós seidauk iha, ami diresaun tenta hela, para pelumenus ita hetan tiha estatutu guarda floresta ninina para iha rejíme espesiál ida ba sira, pelumenus para bele fó forsa ba sira, para bainhira sira halo kna'ar iha kampu, bele iha serteza lei ninian ne'e para asegura sira nomós asegura sira-nia asaun ne'ebé sira halo", dehan nia.

Maske númeru guarda sei limitadu inklui hasoru problema iha estatutu, maibé pesoál florestál sira nafatin hala'o hodi funsaun ne'e la'ós kontrola nomós halo extensaun.

"Entaun, sira ko'alia kona-ba sosializasaun, sensibilizasaun ba floresta nian ne'e, depois halo viveirus, akompaña tékniku, akompaña ema ne'ebé mak atu ba tesi ai, sira ne'ebé mak hatama pedidu mai ne'e, ami-nia guarda floresta sira ne'e, ami iha kampu. Pelumenus ami agora ho númeru 80 de'it", informa nia. (*)