Sekretáriu Estadu Assuntu Veteranu, Gil da Costa Monteiro ‘Oan Soru’ hatete, inaugurasaun uma veteranu ida ne'e, tanba durante prosesu hetan apoiu husi Estadu.

Orsamentu ne'ebe atribui ba prosesu konstrusaun refere, parte Estadu apoiu rihun US$40.

Maibé antes ne'e, Governu mós atribui ona orsamentu ba benefisiáriu hamutuk na’in-100-resin, tuir konstituisaun artigu 11, no estatutu kombatente artigu 23 no dekretu Governu númeru 16/2020 dia 30 outubru.

“Orsamentu ne’ebé aprova hodi atribui iha primeira faze bá konstrusaun ka abitasaun bá ema 100-resin ne’e bazeia bá konstituisaun artigu 11, estatutu kombatente artigu 23 no dekretu Governu númeru 16/2020 loron 30 outubru, no señór Railakan ninia uma konstrusaun ne’e tama iha alínea B, alínea A dehan, bá kombatente ne’ebé seidauk iha uma, nia rasik halo ninia uma ne’e”, dehan nia hafoin inaugura ba uma Veteranu Filipe Belo Rai Lakan iha Metinaro, sábadu (11/09).

Iha prosesu atribuisaun ne'e, hakerek ona iha alínea B husi estatutu kombatente libertasaun, katak kombatente sira ne’ebé iha ona uma maibé kondisaun ladún di’ak, estadu prontu akompaña konstrusaun to'o 100% tuir diretu ne’ebé iha.

Entre veteranu atus-ida-resin ne’ebé mós hetan ona apoiu husi Governu, liuhusi artigu 34, tenke hatudu sira nia rezultadu kontribuisaun ba povu no nasaun.

Tanba, osan ne’ebé apoiu ne'e, mai atu halo uma, no entre sira 100-resin ne’ebé mak primeira faze benefisia ona bá apoiu ida-ne’e, nia laiha ona direitu atu husu ba Estadu katak, nia uma laiha.

"Iha akórdu ne’ebé asina iha ne’ebá, sira-ne’ebé foti osan ne’e, karik iha territóriu tomak ne’e, ida-ne’ebé mak asesu ona ne’e lee didi’ak akórdu ne’e, tanba akórdu ne’e na’in mak asina mak ida-ne’e duni”, hatete nia.

Veteranu Filipe Belo 'Rai-Lakan' deklara, nia parte sente kontente np agradese ba Governu liliu membru organizasun PSHT ne’ebé durante ne'e apoiu servisu badaen nian hodi reforsa prosesu halo uma to'o remata no ohin (11/09) bele simu uma husi Governu liuhusi Ministériu Assuntu Kombatentes Libertasaun Nasionál (MAKLN).

Kona-ba prosesu konstrui Uma refere, halo iha tinan 6 nia laran hahú husi tinan 2016-2021, no osan privadu ne’ebé investe ona ba uma ne'e hamutuk tokon US$1, inklui osan ne’ebé apoiu husi estadu, ne'e totál rihun US$40.

Tuir lei, kada benifisiáriu ne’ebé hetan apoiu osan Estadu ho montante rihun US$.40, labele rai maibé tenki gasta bá konstrusaun uma to'o remata.

"Entaun orsamentu estadu ne’ebé mak simu ne’e gasta hotu kedas no oituan maka uja hodi ohin ita han hamutuk ne’e”, dehan nia.

Maske hetan ona apoiu estadu maibé ne'e mós kontribui husi grupu balun, tanba ne'e, fó agradese ba grupu PSHT tanba ajuda tinan barak ona.

"Ita selu badae osan la to’o, sira-nia ajudasauun iha tinan ne’e nia laran ne’e sira ajuda gratuitu, laiha tan ema ida seluk sentavu ida, material mak ha’u-nian”, afirma nia.

Enkuantu uma refere, nia medida 15×9, kuartu 6 no kuartu 4 iha andar okos no rua iha andar leten, kompleta mós sala vizita rua sala jantar ida, hariis fatin ida, no dapur iha laran.

Iha seremónia inaugurasaun uma refere, hetan partisipa direta husi Vise Xefe Estadu Maiór Jenerál F-FDTLL, Majór Jenerál Falur Rate Laek, Deputadu bankada PLP, Cornélio Gama ‘L-7’, reprezentante husi Konsellu Kombatente Libertasaun Nasionál (KKLN) no hettan tan, nomós hetan bensaun husi padre pároku Metinau. (*)