"Hanesan kapitál agora dadauk sira iha mak ekipamentu e parte sekretária de estadu mós sei asegura, buka ofisina sira ne’ebé di'ak atu oferese tékniku hadi'a mákina sira ne'ebé aloka iha ne'e atu bele di'ak liután hodi halo operasaun, e motiva nafatin sira atu nune'e nafatin kuda, hakiak, hodi oferese ba merkadu. Ida ne'e mak parte edukasaun ida", hatete Elizário Ferreira, iha Sede MOKATIL, Suku Liurai, Aileu, segunda (13/09).
Husi parte tékniku nian, bainhira mákina hirak ne'e halo hotu ona nia manutensaun, membru sira uza servisu atubele jere kooperativa ho di'ak liután hodi asegura nia sustentábilidade institusionál, nia estabilidade finanseira no estabilidade ekonómiku, inklui asegura membru sira-nia bein-estár iha família ida nian.
Nune’e fó hanoin ba membru MOKATIL sira, tenke halo servisu kooperativa ida ne'ebé nia benefísiu ba duni membru sira, la'ós dependénsia fali ba ema seluk, ka rezultadu servisu labele entrega ba ema seluk mak jere fali.
"Instituisaun ne'ebé hahú husi leten ba kraik, sei la moris e kooperativa sei mate. Maibé, instituisaun ida husi kraik, nia sei fó ba nia moris rasik. Kooperativa ne'e moris, imi-nia kapitál mak to'os ne'ebé imi halo, imi-nia kapitál mai animal sira ne'ebé imi hakiak", hatete nia.
Prezidente MOKATIL Munisípiu Aileu, Januário Ximenes Araújo hatete, mákina hirak ne'e durante paradu, la'ós tanba nia kondisaun mak aat, maibé tanba kauza husi situasaun globál pandemia Covid-19, nomós regra balu ne'ebé limita ema nia atividade, ikus mai prejudika toos na’in sira labele halo servisu.
"Mákina sira ne'e la'ós aat, maibé durante ne'e ami mak la halo duni operasaun. Maibé, ami agradese ba sua-exelénsia SEKoop, bele ajuda sira atu hakmaan servisu balu, hanesan atu halo manutensaun ba ami-nia mákina”, afirma nia.
Enkuantu, mákina sira ne'e kompostu husi dulas batar Kay Rala, sorgum inklui seluk tan, ne'ebé tulun husi governasaun anterior, liuhusi eis Sekretária Estadu Kooperativa (SEkoop), Arsénio Pereira. (*)