"Subsídiu ida-ne’e, hanesan produtu agrikola nasionál ne’ebé sei fó ba funsionáriu públiku sira ho objetivu permite hamenus despeza ho akizisaun ba ai-hán sira no konfesaun refeisaun sira, atu promove akizisaun produtu agríkola sira husi produtór nasionál, nomós atu insentiva aumentu produtividade setór agríkola nian", dehan Ministru Prezidénsia Konsellu Ministru, Fidelis Leite Magalhães, iha Palásiu Governu, segunda (20/09).

Fulan-fulan funsionáriu públiku sira iha direitu ba foos 35 kilograma (kg), batar kilo lima, koto kilo lima, fore-mungu kilo lima no fore-keli kilo rua.

Karik laiha produtu sira anteriór balun ne’ebé temi ona, bele troka ho produtu sira-seluk ho valór hanesan. Sei entrega trimestralmente husi órgaun no servisu sira ba benefisiáriu sira ne’ebé ezerse ninia funsaun.

Nune'e, Konsellu Ministru aprova mós  projetu Rezolusaun Governu kona-ba jestaun no realokasaun veíkulu sira Estadu nian ne’ebé aprezenta husi Ministru Finansas.

Rezolusaun ida-ne’e prosede introdusaun ba medida sira jestaun lobun ida ba veíkulu sira Estadu nian atu hamenus despeza ne’ebé ba nia atribuisaun no promove rasionalizasaun ba parke automovel públiku.

"Ho aprovasaun ba Rezolusaun Governu nian ida-ne’e, entre medida sira-seluk, sei suspende akizisaun ba veíkulu sira Estadu nian iha tinan 2022, liuhusi despaxu, Ministru Finansas, sei fixa númeru limitasaun ba viatura sira ne’ebé aloka ba órgaun no servisu ida-idak, kualkér akizisaun ba veíkulu sira Estadu nian sei kompensa ho alineasaun ba númeru veíkulu hanesan, no veíkulu hotu Estadu nian sei rejista iha baze dadus nasionál nian", esplika Fidelis. (*)