Diretór Nasionál ba Dezenvolvimentu iha Setór Kooperativa, Reinaldo Borges esplika, programa haat ne'ebé diresaun ne'e halo ona ezekusaun mak hanesan, halo sensibilizasaun, formasaun bázika, formasaun espesiálidade, no halo akompañamentu ba grupu kooperativa sira, atu fahe informasaun ba komunidade sira kona-ba lala'ok kooperativa nian.

“Apoiu jestaun ida ne'ebé di'ak no loos tuir padraun kooperativa ne'ebé iha, atu nune'e sira bele envolve, hala'o, no dezenvolve atividade kooperativa nian ho di'ak no loos, hodi bele aumenta kresimentu ekonómia komunidade nian iha baze liuhusi atividades kooperativa”, informa Reinaldo Borges, iha Federasaun Hanai Malu (FHM), Bairopite, kuarta (29/09).

Tuir dekretu lei númeru 138/16/2004 katak, bele haburas no dezenvolve setór ekonómia baze sai forte no metin liután hodi kria kampu sira iha komunidade nia leet.

“DNDSC nafatin servisu habelar informasaun ba komunidade sobre sistema kooperativa nian no fasilita grupu ne'ebé hakarak transforma ba kooperativa, e fó sistema mós ba kooperativa ne'ebé eziste ona”, hatete nia.

Enkuantu, atividade hirak ne'ebé durante ekipa sira SEKoop nian hala'o hanesan, sensibilizasaun kona-ba kooperativa iha fatin ualu, formasaun bázika kooperativa iha fatin hitu, kria semináriu ba dirijente sira kooperativa nian, halo selesaun ba formadór sira, halo auditória, inklui prepara ona mós assembleia estraordinária ida. (*)