Negosiante Arnaldo Amaral da Silva hatete, sira-nia parte simu ona desizaun atu sai iha loron 10 fulan outubru ne'e nia laran, maibé atu kolabora ho desizaun refere presiza kria uluk kondisaun ba sira.

"Prezidente Autoridade Munisipál mai iha ne'e fó ultimatu ba ami, katak hahú husi dia 1 to'o 10, ami atu husik fatin ida ne'e, maibé ami mós tenke husu ba sira nafatin hahú husi dia 1 to'o 10, sira tenke prepara ba ami hanesan negosiante”, dehan nia ba www.tempotimor.com iha Tabesi, domingu (03/10).

Dadauk, merkadu nasionál iha Timor-Leste ne'e hamutuk rua de'it mak Taibessi no Manleuana, maibé atu muda ba manleuana mós presiza haree lai kondisaun atu nune'e vendedór sira bele hakmatek hodi buka moris.

"Ida ne'e ami-nia preokupasaun, tanba sé halo reabilitasaun ba kampu hanesan sira dehan, ne'e kan hanesan ita ko’alia ona ba konstituisaun nasaun nian, ne’ebé ita hotu apoiu, laiha sidadaun ida halo dezenpeñamentu ba dezenvolvimentu nasaun nian”, esplika nia.

Tanba ko’alia kona-ba nogosiante ne'e presiza iha kondisaun, atubele fa’an ropa ka sasán ruma, enkuandu la kria kondisaun ida ne'e difísil tanba atu lori sasán ba tau iha ne'ebé.

Ne'e duni, husu Governu presiza kria komunikasaun entre negosiante sira tanba ida ne'e importante atubele kria kondisaun ba malu maibé Governu labele hanoin de'it mak ba hasai negosiante sira ho forsa.

"Ita sidadaun ka negosiante ita laiha forsa, maibé ha’u fiar katak antes sira atu hasai presiza mós ita halo komunikasaun ba malu. 

Maibé kondisaun seidauk iha, mak Governu ba ho forsa obriga sira sai, mak negosiante sira prontu buka meiu atu halibur estudante sira atu nune'e hamutuk hodi ko’alia problema ne'e.

"La'ós siknfika katak ami husu kondisaun ba ita-boot sira ita-boot sira prepara ona mak ami lakohi ba ne'eba no hakarak mantein nafatin iha ne'e mak ami sala”, hatete nia.

Negosiante Zefrino Soares hatete, nia parte sente triste no preokupa tanba situasaun Covid-19 agora ne'e foin mak la'o normal hikas, maibé autoridade sira no jestaun de merkadu, fó ultimatu ba sira hakarak ka lakohi loron 10 tenke sai.

"Ne’ebé ami vendedór iha ne'e, ami la satisfas ho desizaun ne’ebé mak hato'o husi ne'eba mai, e ami hakarak, ami iha ne'e kan barak, maibé iha ne'e ami 14 (orang) mak sira fó apoiu duni dehan preparasaun fatin ba ami para ami bele ba”, hatete nia.

Maske pozisaun negosiante sira simu ona orientasaun atu husik fatin maibé tenke prepara fatin ida di’ak ba sira, atubele tau sasán.

"Ami-nia moris loroloron mak ida ne'e ona, se ita-boot sira hasai tiha ami husi iha ne'e, ami atu tane liman ba se los”, afirma nia.

Haree barak ne’ebé prepara ba negosiante sira husi Merkadu Halilaran, muda ba Taibessi hodi okupa fatin refere husi tinan 2013 to’o agora. (*)