Print this page

MAPKomS Deklara Governu La Halakon Subsídiu ba Liña Frente 

By October 04, 2021 987
Ministru Asuntu Parlamentár no Komunikasaun Sosiál (MAPKomS), Francisco Martins Jerónimo. Ministru Asuntu Parlamentár no Komunikasaun Sosiál (MAPKomS), Francisco Martins Jerónimo. Foto Suplay

Tempotimor (Dili)-Ministru Asuntu Parlamentár no Komunikasaun Sosiál (MAPKomS), Francisco Martins Jerónimo deklara, Governu sei selu subsídiu ba liña frente sira, tanba osan ne’ebé iha sei selu iha loron.

“Relasiona ho frontline, ne'ebé deputadu CNRT Maria Fernanda Lay, preokupa no lamenta katak Governu atraza selu funsionáriu ne'e los, maibé importánte agora ne'e osan fula-fulan ne'e mak labele para, subsídiu ne'e loron ida sei selu, se la selu ohin sei selu iha aban, se la selu fulan ne'e sei selu iha fulan oin, ida ne'e mak ha'u hatete, e osan ne'e la lakon ida, sei selu hotu”, dehan Ministru Francisco Martins, iha Parlamentu Nasionál, segunda (04/10).

Tanba prosesu hothotu la'o hela, husi parte PNTL, no liña frente sira ne'e barak mak hatama ona naran iha Sekretáriadu ba Covid-19 ninia, maibé sei halo justifikasaun ba lista refere.

“Prosesu la'o hela, so que lista ne'ebé ba ne'e presiza halo klarifikasaun, justifika filafali, ita labele hothotu hanesan de'it, tanba dalaruma iha situasaun hanesan ne'e aproveita buat lalos ba hotu iha laran, ne'e mak ha'u dehan lori ona bá Sekretáriadu Covid-19 ninia, iha Ministériu Finansas (MF) maibé sira haruka filafali tanba presiza halo justifikasaun ba ema sira ne'ebé mak ita haree katak, tuir lolos sira ne'ebé la presiza, ita presiza identifika duni, ita la identifika ne'e labele”, afirma nia.

Ho ida ne’e, Ministériu Saúde nia prosesu la'ó besik atu hotu no la kleur ekipa sira ne’ebé servisu iha liña frente sei hetan sira-nia subsídiu refere.

Tanba preokupasaun husi Deputada Congresso Nacionál de Reconstrução de Timor (CNRT), Maria Fernda Lai, ne'ebé kestiona kona-ba Governu atraza selu funsionáriu, ajente no traballadór sira ne'ebé servisu iha liña frente.

“Ha'u hakarak atu husu ba señor ministru asuntu parlamentár liga ho dekretu lei suplementu remuneratóriu ba funsionáriu, ajente, e traballadór sira. Iha preambulu dekretu lei atu fó sira remunerasauni ida para fó prevensaun no imetigasaun ba covid-19. Intensaun governu nian ne'e di'ak, mais na realidade ezekusaun muito pobri”, dehan nia plenária PN, segunda (04/10). (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items