"Ohin oportunidade di'ak ida hamutuk ho Sekretáriu estadu ita fó pose ba iha konseleiru sira, konsellu nasionál estadu traballu ho konsellu arbitrajen hanesan ne'ebé sei hamutuk ho Governu buka dalan atu hadi’a ambiente traballu ba ita-nia ekonomia iha Timor-Leste", dehan Ministru Koordenadór Asuntu Ekonomia, Joaquim Amaral, iha salaun SEFOPE Kaikoli, segunda (11/10).
Tanba situasaun Covid-19 ekonómia hetan difikuldade nune'e mós estrutura konseleiru anterior sira-nia mandatu suspende tiha servisu tinan ida, entaun presiza atu fó enerjia foun ba ambiente ida atubele tulun Governu hadi’a ambiente traballu nune'e permite ba investimentu sira.
"Ita-nia ekonomia rekopera, ambiente traballu mós ita hadi’a no ha'u fiar katak, ho ekipa foun ho sira-nia enerjia, ho sira-nia dinámika lne'ebé iha, sira sei halo estratéjia ne'ebé mak di'ak atubele fó solusaun propriadu ba asuntu ne'ebé iha", afirma nia.
Apoiu konkretu hanesan Governu legislasaun presiza halo iha ninia kuadramentu legal nune'e iha komfiansa ba autór ekonomia sira, emprezáriu no traballadór sira hodi hatene nia direitu nomós nia obrigasaun iha ambiente traballu.
Prezidente Konsellu Nasionál do traballu, Alarico de Rojario hatete, agradese ba Ministru Koordenador Asuntu Ekonomia, Joaquim ne'ebé fó fiar ho kna’ar ne'ebé simu ona.
"Kna’ar mesmu todan maibé ami koko atu kontinuasaun banati tuir sesante sira ne'ebé servisu durante ne'e la'o iha rai laran”, dehan nia. (*)